School Education & ICT Minister-in Vairengte Taxation DCC leh School te a tlawh

Hnahthial Post | October 30, 2025, Aizawl: Vawiin khan School Education & ICT Minister, Dr. Vanlalthlana chuan Vairengte ah Taxation Data Collection Centre leh School pali a tlawh.

Minister hian Vairengte a pan hma hian Kolasib-a Deputy Commissioner of State Tax, Kolasib Zone Office chu a tlawh hmasa a. Heta thawktute chu fuihin, theihtawp an chhuah tlan chuan Tax revenue tun aia tam an hmuh theih ngei a beisei thu a sawi. Taxation Office-a thawktute hian Minister hnenah hian Kolasib Zone a an hmalakna hrang hrangte lo hrilh in , Kolasib hnaih a Tax inspection point awm thei se an duh thu leh an mamawh dangte an thlen.

Kolasib atang hian Minister hian Vairengte pan nghalin, Govt. Vairengte PS-VII, Govt. Vairengte High School, St Henry School leh Govt. Vairengte Higher Secondary School te a tlawh a. Heng school a tlawhnaah hian thawktuten Minister hnenah hian an mamawh leh indaihlohna te an lo thlen nghal a ni.

School a tlawh zawhin, Vairengte a Taxation Data Collection Centre tlawh in Dr. Vanlalthlana chuan vawiina a lo kal chhan ber chu an harsatna neih te a hmun ngeia enfiahpui leh an hmunhma te a hmun a tlawh tura lokal a nih thu a sawi a. Tax luh that tawk loh chhan zinga langsar zual te tarlangin, "Tax pumpelhna chi hrang hrang - Vairam atanga thil lei, Mizorama rawn hralh leh si , amaherawhchu vairam a tax pe si te, Mizorama thil hralh, Mizorama hralh ang ni lova ziah te leh tax pumpelhna kawng tam tak a awm thin a ni," a ti a. Hemi piah lamah hian, engtiangin nge tun aia chak zawk leh tam zawka tax collection tihpun a nih theih ang tih chu a ngaih pawimawh a nih thu a sawi bawk.

Minister-in Vairengte leh Kolasib-a School leh Taxation hmunhma te a tlawhnaah hian Pu HK Lalhawngliana, Commissioner of State Tax, Finance Department; Pu C. Lalthanzira, State Project Director, Samagra Shiksha Mizoram; SDO (C) Vairengte; DEO Kolasib; leh mi pawimawh dang ten an tawiawm a ni.