Denlung khuaah Lal Vandula lungdawh leh Lalnu Ropuiliani thlan Minister of State, Pu B Lalchhanzova'n a hawng

Hnahthial Post | October 30, 2025, Hnahthial: Vawiin khan Denlung khuaah Minister of State, Pu B. Lalchhanzova chuan Lal Vandula leh Lalnu Ropuiliani Thlan hawngin tlawm ve lo Ropuiliani anga hnam dang laka tlawm ve lo tur chuan thangtharte chu thiamna lamah kan intuai hriam a tul takzet a ni a ti. South Tuipui Bialtu MLA, Pu Jeje Lalpekhlua chuan Khual Zahawm niin thusawina hun a hmang bawk a ni.

Minister chuan Ropuiliani chanchin tawi sawiin Mizo hnam tana a inpekna chu tangkam maia sawifiah theih a nih loh thu a sawi a. Lalnu Ropuiliani thlan hawn tak hian mitin thinlungah hnam tana inpekna tuh thar leh se a duh thu sawiin chumi atana pawimawh, rinawmna, huaisena leh mahni hnam tana din ngheh tlatna rilru pu theuhva, chu chu midang tih tura dah lova, mahni mawhphurhna theuhva dah turin kalkhawmte chu a chah a ni.

Lalnu Ropuiliani atanga entawn tur pawimawh tak chu a tlawm ve lohna nun a nih thu sawiin Mizo hnam hi hnam dang laka kan tlawm ve loh nan chempui leh tharum a tawk tawh loh thu a sawi a. Zirna leh thiamna lama kan intah hriam hi hnam humhimna pawimawh berte zing ami a ni tiin chumi tur chuan mahni zirna leh hna theuhvah rinawm a tul a ni a ti bawk. Minister chuan Revenue Department a chan hnu hian ram inches khat pawh a thlawna a dawn ve duh ngai loh thu sawiin chutiang ang bawk chuan rinawm takin mahni tihtur theuh hlen thin turin mipuite chu a chah a ni.

Bialtu MLA, Pu Jeje Lalpekhlua chuan Mizo ten mi ropui kan neih lar berte zing ami, hmeichhe dinhmun chawisangtu Lalnu Ropuiliani thlan kan hawng thei chu lawmawm a tih thu sawiin a nunah zir tur tam tak a awm thu a sawi a. A sulhnu atangin rinawmna, mahni tan hmunah theihtawpa tan ngamna zir chhuak turin mipuite chu a sawm a. Dikna chawi nunga, sum dik lo laka inthiarfihlim hi khuareiah a tlo ber tih hre turin mipuite chu a chah a ni.

Bawrhsap, Pi K.Vanlalruati chuan Denlung khua chu hmanlai sulhnu pawimawh ngaihlu thiam an nihna chu fakin Denlung chu khaw lian tak ni lo mah se Hnahthial District tan mai ni lo, Mizoram tana hmun pawimawh tak a ni thu a sawi a. Hnahthial District mipuite chu hmanlai thil hlu an neihte ngaihlu thiam a, tuai hnum thar zel turin a chah nghal a ni.

Thlan hungna hi a a vang feet 12 niin a dung feet 15 a ni a. Lungdawh Lungphun hi Lalnu Ropuiliani leh Lal Vandula tana phun a ni a.

Lalnu Ropuiliani lungphun :-

A san zawng - 5'4" ; A hlai zawng : 2'9"

Lal Vandula lungphun :-

A san zawng - 5'3"; A hlai zawng : 3"

Lal Vandula Lungdawh leh Lalnu Ropuiliani thlan hi Denlung branch YMA leh Denlung khawtlang mipuite sak niin Mizo mistiri vek hman ni a tarlan a ni a. A sakna tur hi Pu Lalthuama Sailo (Ropuiliani tuchhuan Thumna, Hrangphunga thlah, Aithur lal Vanhnuaithanga Sailo fapa) thawh niin cheng nuai 5 (Rs.5 lakhs) vel sen a ni.