Prof Lalnilawma’n sawhthing, hmarcha leh aieng sawngbawlna Primary Processing Plant a hawng

Hnahthial Post | October 30, 2025, Serchhip: Chhingchhip MIFCO Complex-a Ropuiliani Women Farmer Producer Company Ltd ten Primary Processing Plant an bun thar chu vawiin khan Rural Development & Administration changtu Minister Prof.Lalnilawma’n a hawng.

Prof.Lalnilawma chuan kut hnathawktuten an thawh rah an hmuh hi a pawimawh ber a, mi harsa zawk ten leirem an rah theih nan i tang tlang zel ang u, tiin kalkhawmte a sawm a. MIFCO-in Chhingchhipa an hmunah Ropuiliani WFCL-te thlai thar sawngbawlna tur khawl bunna tur hmun an pe chu lawmawm a tih thu sawiin SHG nuho leh kuthnathawktute tan a tangkai hle dawn a ni, a ti. Khuallian chuan market linkage chungchangah kan thlai thar te state pawna hralhchhuak thei turin quality tha a pawimawh, a ti a. Tuna khawl thar bun tak hian thlai thar, a bik takin sawhthing, hmarcha leh aieng hralh kawngah a hlutna a tisang hle dawn a ni, a ti. Reliance Mumbai te nen inremna thuthlung an ziah chungchangah Prof Lalnilawma chuan thlawhnaa thlai thar thawnchhuah a ngaih thin avangin a senso a sang a. Tunah chuan tlawm zawka thawn theihna turin Mizoramin Train service a neih tak avangin chhunzawm an tum thu a sawi bawk.

Mizoram State Rural Livelihood Mission (MzSRLM) hnuaiah Mahila Kisan Sadhaktikaran Pariyojana Project kaltlangin Ropuiliani Women Farmer Company Ltd hi kum 2020 khan din a ni a. COVID hripui leng vangin harsatna an tawh hnuah 2023 atang khan chak zawkin hma an la chho a. District 7 ah Rural Development Block 16, khua 154 tuam chhuakin member 5335 an nei mek a ni. Ropuiliani Producer Company a share holder te tharchhuah sawhthing, Mizo hmarcha leh aieng te man man zawka lei sakin, a hlutna tipung tura sawngbawl a nih hnuah an hralh chhuah leh thin a ni. Vawiin thleng hian chutiang tur chuan hmalakna a kal reng a, kuminah ngei pawh hian theihtawp chhuaha lei sak leh an tum a. Chutianga kuthnathawktute thlai lei sak tur chuan Ropuiliani Company ah hian inziah luh a ngai thung a. He company a inziak lutte chu SHG member an ni tur a ni a. Anni hian cheng 150 (share) pe in Company neitu nihna an nei thei a ni.

He hun hi Pi Zosangzuali Pachuau, CEO, MzSRLM chuan a kaihruai a. MIFCO Chairman Pu Lalthazuala Rawite chuan kalkhawmte lawmna thu a sawi a. Pu Henry Saingura, CEO, Ropuiliani WFPCL chuan sawngthing sawngbawlna bun a nih chhoh dan leh an hnathawh dan tur (Technical Report) a pe a. Dr Zomuankima,Chief Opening Officer, MzSLRM chuan lawmthu sawiin hun a khar a ni.

Ropuiliani WFPCL Primary Processing Plant hawnna inkhawmah hian Serchhip Deputy Commissioner Pu Paul L. Khuma, Rural Development Director Pu K. Lalrohlua, SIRD&PR Director Pu R. Lalremsanga, Departmen bakah DRDO, P&E, I&PR, MIFCO, MzSRLM, State Mission Manager Livelihoods,District leh Block Staff, Company Staff, Ropuiliani Women Farmer Company Ltd Board Of Directors te leh member te, Chhingchhip khawtlang hruaitute leh mi pawimawh dangte an tel a ni.

Khuallian hian sawhthing, hmarcha leh aieng sawngbawlna Spices Processing Centre chu a hmunah tlawhin, an khawl bunin hna a thawh dan tur enchhinna (trial run) neih nghal a ni a. He khawl hian thlai thar tihfai leh tihro hna bakah, hralh chhuah tura her sawm leh chan sawm hna a thawk dawn a. Elevator Conveyor (thlai phur chho tu), Drum Washer (lei tifaitu), Bubble Washer Conveyor (silfaitu), Air Dryer Conveyor (a chhem rona), Slicer Machine (a chansawmna), Heat Pump Dryer (tirotu) te a keng tel a ni.

MIFCO hmuna programme hman zawh hian Prof Lalnilawma hian Chhingchhip Sainik School a tlawh nghal bawk a ni.