Lungleiah MAL Joint Headquarters leh Govt J. Buana College Mizo Department huaihawtin "C. Ṭhuamluaia Sulhnu Zir Hona" buatsaih a ni

Hnahthial Post | October 30, 2025, Lunglei: Vawiin khan Mizo Academy of Letters (MAL), Joint Headquarters Lunglei leh Department of Mizo, Government J. Buana College (GJBC), Lunglei te ṭang kawp huaihawtin Lungleia GJBC Multipurpose Hall-ah "C. Ṭhuamluaia Sulhnu Zir Hona" (One Day State Level Seminar) buatsaih a ni a. Lunglei Municipal Council (LMC) Chairman Pu Lalzuithanga'n khuallian niin a hmanpui.

LMC Chairman Pu Lalzuithanga chuan C. Ṭhuamluaia chu Lungleia Dhubi Mual (tuna C. Ṭhuamluaia Mual) vantlang kuta a awm theih nana a thawh hlawkna te, thu leh hlaa a sulhnu ṭha tak tak avang tea hriat reng hlawh tawh tur a nih thu sawiin, MAL Joint Headquarters leh GJBC Mizo Department te'n a sulhnu zir hona an buatsaih chu ropui a tih thu a sawi a. Mi ropuite chu an liam hnuah, khuareiah an hlutzia a hriat chho zel tih sawiin, mi ropuite chanchin ziaka awm lo, ṭawngka leh titia inhlan chhawnte pawh pawl leh mimal ṭhahnem ngaite hma laknain an chanchin chhui leh chhawp chhuah a ni ṭhin chu hlu a tih thu a sawi a. MAL leh zirna ina thawkte, ziak mite leh zirlaite chu ram leh hnam tana mi hlute chanchin vawn ṭhat, dap chhuah leh zir chian kawngah theih tawp chhuah zel turin a chah.

C. Ṭhuamluaia sulhnu zir hona hi MAL Jt Hqrs Lunglei Vice President Pu Pc. Lalduhthlanga'n kaihruaiin, GJBC Principal Pi Lalthangmawii Chhangte chuan inlawmna thu a sawi a. Organising Secretary Pu Rochharzela'n seminar buatsaih tura hma lak dan tar langin, MAL JHQ Patron Pu RK Lalhluna (Thih ni: 25.10.2025) leh Life Member Pu P. Lalrinsanga (Thih ni: 02.10.2025) te sunna hun hman a ni a. Keynote speaker, GJBC-a Associate Professor & Head of Department (Mizo) Pu KF Lalṭhuamluaia (Ṭhuamtea Khawlhring) chuan C. Ṭhuamluaia chanchin leh thu leh hla a thiamzia a sawi zau va. C. Ṭhuamluaia tu leh fate ai awhin Accredited Journalist Pu Chawngchhuana Chongthu chuan thu sawiin, zaithiamte an zai bawk.

Lunglei Government College (LGC)-a English Department-a Associate Professor Dr F. Lalchhanhima leh GJBC-a Mizo Department-a Assistant Professor Pu Ngurthansanga Sailo te kaihhruaiin C. Ṭhuamluaia sulhnu zirtute thuziak zir ho a ni a. Resource person pali - Pu R. Lalruatpuia, Lecturer, Department of Mizo, Christian Education Centre, Lunglei ("C. Ṭhuamluaia Themthiamna"); Dr F. Lalfakawmi, Assistant Professor, Department of English, Government Champhai College ("The literary art and thematic focus of C. Ṭhuamluaia"); Pu Lalhlimpuia, Lecturer, Department of Mizo, Baptist Higher Secondary School, Lunglei ("C. Ṭhuamluaia thu ziaka hla leh ṭawng a thlir dan bih chianna leh finthuril a pai seprawtuina") leh Pi R. Ramdinmawii, Assistant Professor, Department of Mizo, GJBC, Lunglei ("C. Ṭhuamluaia ṭawngkam hman dan bih chianna") te'n an thuziak chhiarin, an sawi zau va. Sawi hona hun hman a ni bawk.

Seminar kharna hunah Seminar Coordinator, GJBC-a Assistant Professor Pi ZD Vanlaldinpuii'n certificate sem huaihawtin, MAL JHQ Secretary Pu TC Jonunsanga'n lawm thu sawiin hun a khar.