FCS&CA Minister-in FCS&CA kudama hman tur Digital Weighing Scale khuhhawnna leh vailiamna hun hmang

Hnahthial Post | October 8, 2025, Aizawl: Vawiin khan Pu B. Lalchhanzova, Minister, Food Civil Supplies & Consumer Affairs (FCS&CA) Department chuan FCS&CA kudam zawng zawnga hman tur Digital Weighing Scale (DWS) thar 112 khuhhawnna chu Govt. Muanna Godown (GMG), Muanna Veng-ah hmanpuiin, Saitual, Khawzawl leh Champhai district-a hman tur DWS 35 phurtu motor a vai liam nghal a ni.

Minister Pu B. Lalchhanzova chuan FCS&CA kudam zawng zawnga Digital Weighing Scale hman a ni tawh dawn chu lawmawm a tih thu sawiin, mipuite’n sawrkara rinna an nghah theihna tura hmanraw tangkai tak a nih thu a sawi a. FCS&CA Department chu thla tina mipui mamawh petu an nih avangin dik tak leh rinawm taka hna an thawh a pawimawh thu a sawi a. Minister chuan kan hnathawhna apiangah hnuhma tha kan hnutchhiah a pawimawh, a ti a. Aizawl East leh Aizawl West DCSO office tur MINECO-ah sak a nih dawn thu a sawi bawk a. Tun dinhmunah hian FCS&CA chuan mipuite ngaihngam taka an awm theihna tur khawp buhfai kudamah an chhekkhawl thu a tarlang a ni.

Vawiin hun hi Pu Andrew H. Vanlaldika, Addl. Secretary, FCS&CA chuan kaihruaiin, kalkhawmte lawmna thu a sawi a. Pu Victor Lalawmpuia, Joint Director, FCS&CA hnen atangin report ngaihthlak a ni a. Pi Saizikpuii, Director, FCS&CA chuan lawmthu sawiin hun a khar a ni.

Digital Weighing Scale (platform type) leina tur hian sawrkar atangin Rs. 86 lakh hmuh a ni a. Original Equipment Manufacturer (OEM) hnen atanga direct-a lei niin, tender chhangtu Company 4 atangin Weightex Scales, Haryana-te thlan an ni a. DWS hi district hrang hranga FCS&CA kudam zawng zawnga hman tur 112 lei a ni a, tum khatah 25 quintal-a rit a buk theih a ni. August 29, 2025 khan Haryana-a Weightex Scales factory atanga rawn phurh chhoh niin, September 11, 2025 khan GMG Muanna Veng, Aizawlah rawn phurh thlen vek a ni a. A company technician-te’n September 19 khan GMG-ah an remkhawm a, Legal Metrology lamin Digital Weighing Scale-te calibrate hna an thawk nghal a ni.

District 3 - Saitual, Khawzawl leh Champhaia FCS&CA kudam hrang hrangtea hman tur remkhawm sa leh calibrate sa DWS 35 motor-a phurh chhuah nghal a ni a. Remkhawm leh calibrate hna hi tih chhoh zel niin kudam zawng zawngah a rang lama hman tura dah vek a ni ang. October 7, 2025 thleng khan GMG-ah buhfai quintal 33075.76 leh chini quintal 208.94 chhekkhawl a ni.