Mizoram Larsap hovin RTI Week 2025 hmang

Hnahthial Post | October 8, 2025, Aizawl: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan ATI Auditorium, MINECO-ah Right to Information (RTI) Week, 2025 lawmna hun Khuallian niin a hmanpui a. Right to Information Act, 2005 Sec 4 (1) (b) in a phut anga Public Authority website enkawl thate bakah MIC logo design competition-a pakhatna hnenah lawmman a hlan a ni.

Larsap General (Dr) Vijay Kumar Singh chuan RTI Act chu langtlang, mawhphurhna la ngam leh mipui telna Sawrkar siamtu, eirukna leh rorelna dik lo hailang a, democracy inghahna leh tha tichaktu a ni, a ti a. Sawrkar laipui ruahmana Sawrkar tha siam tura hmalaknate tarlangin, hengte hi langtlang leh mipuite thuk zawka telna tur sawrkar din tura siam vek a ni, a ti a. Mizoram Information Commission hmalakna fakawm a tih thu sawiin, India rama RTI online kalpui hmasa 8-na a ni leh complaint an dawnte chinfel nghal zel a nite, RTI inzirtirna zau taka kalpui a nite, kum tin report mumal tak an tichhuak ziah thinte leh department website website uluk taka an vil thinte, VC/LC te RTI huamtira Public Authority atana dah an ni leh Village Council President leh Local Council Chairman-te SPIO atana ruat a ni chu lawmawm a tih thu a sawi bawk.

Larsap chuan RTI Act chu mipuite tha tichaka thuneihna petu a nih laiin, midangte chhaihbuai nan hrim hrima hman sual a rem loh thu sawiin, mipui rawngbawlna lam hawi ni lo thil, hun leh tha khawhral nana hman loh tur a ni, a ti a. Sawrkar hnathawkte pawh RTI Act-in a phut angin mawhphurhna an hlen chhuah zel a tul tih sawiin, an nitin hnate thawk thei lo khawpa RTI hmanga harsatna siam sak erawh ven a tul thu a sawi a. RTI Act chu thil tha zawk a awm theih nana hman tangkai a tul thu leh inepa inhuat phah nana hman erawh pumpelh a tul thu sawiin, Sawrkar leh mipui inkara rinawmna, tha taka hna thawk thei tura insiamna leh inrintawnna chawilar nana hman a tul thu a sawi a. Mizoramah sum hmuh nan leh mahni hmasial taka RTI Act hmang sual an awm lo ni a a hriat thu leh chhuanawm a tih thu sawiin, kalkhawmte chu mipuite'n RTI Act an hmelhriat lehzuala tangkai taka hman a nih theih nana theihtawp chhuah turin a chah a ni.

Thusawitu dang Pu John Neihlaia, State Chief Information Commissioner (CIC) chuan Mizoram chu India rama RTI Act bawhzui tha berte zinga mi a nih thu sawiin, RTI buaipuitu zawng zawngte fakawm a tih thu a sawi a. July ni 1, 2022 atangin Mizoramah RTI online system kalpui a nih thu leh India rama hetiang kalpui thei hmasa state zinga 8-na a nih thu a sawi a. Nimin October ni 7, 2025 thlengin RTI online application 22,078 a luh tawh thu leh, chawhrualin nitin zawhna 18.5 zel lut anga ngaih a nih thute, 2025 ah nitin zawhna 23.6 leh October thla bikah nitin zawhna 31 zel lut anga chhinchhiah a nih thute a sawi bawk.

Mizoram Chief Information Commissioner chuan kum 2006-a MIC din a nih atanga kum 19 chhungin complaint 171 an dawn tawh thu leh case pending pakhat mah a awm loh thu a sawi a. Hemi hun chhung hian RTI Application 45,000 chuang lutin 98% te SPIO chhannaah an lungawi a. Heng zinga 730 (2%) te chauh hi SPIO chhan dana lungawi lo, thuneitu sang zawk First Appellate Authority (Department Appellate Authority) hnena zualko an nih thu leh, chuta la lungawi lo 257 (35% of 730) te chauh Second Appellate Authority, Chief Information Commission (CIC) hnena zualko an awm thu a sawi a. December 2023 atangin hmunhlaa awm leh hna avanga buaite tan hybirid hearing/online hearing kalpui a nih thu leh 2023 ah VC/LC te RTI zawhna dawng thei tur Public Authority atana ruatna notification chhuah a nih tawh thu a sawi bawk.

He hunah hian RTI practitioner pahnih, Pi Lalremsangi Fanai, Falkawn leh Pu Zairemthanga, Luangmual te'n sawm an nih angin RTI chungchanga an tawnhriat leh pawimawh ni a an hriatte an sawi a. Pu Mangjangam Touthang, State Information Commissioner-in lawmthu sawiin hun hman a khar a ni.

RTI Week 2025 puala hun hmanah hian RTI Act, 2005 Sec 4 (1) (b) in a phut anga public authority website enkawl thate bakah MIC logo design competition-a pakhatna hnenah Larsap-in heating hian lawmman a hlan:

1) Website enkawl tha Public Authority:

Pakhatna: Directorate of Tourism

Pahnihna: Mizoram State Legal Services Authority

Pathumna: Directorate of Economics & Statistics

Consolation: Planning & Programme Implementation Department, PHE Department

2) MIC Logo Design Competition: Lalhmingmawia, Republic Vengthlang