MSU General Conference vawi 23-na Hnahthialah neih mek a ni; Cabinet Minister Pu PC Vanlalruata'n Zirlaite chu Co-Operative lamah ngaihtuahna seng ṭan turin chah

Hnahthial Post | October 9, 2025, Hnahthial: Cabinet Minister, Pu PC Vanlalruata chuan Mizo Students' Union General Conference vawi 23-na Palai Lawm programme chu nizan (8 October, 2025) khan Lalnu Ropuiliani Run, Bazar Vengah khuallian niin a hmanpui a. Zirlaite chu hmasawnna mila insiamrem zel tura fuihin Mizoram State University chu kum hnih hnu lamah din hman ngei thei turin hma an lak mek thu a sawi bawk. Khual zahawm, Bialtu MLA, Pu Jeje Lalpekhlua chuan zirlaite chu zir sang ringawt lova chhawr tlak ni tura lehkha zir theuh turin a chah a ni.

Khuallian, Pu PC Vanlalruata chuan ram hmasawn nan zirlaite chu thawhpuiah sawmin tunlai hmasawnna hrang hrang, a bikin Rail kawng rawn lut chu a tha lam zawnga chhawr tangkaitu ni theuh turin a chah a. Periodic Labour Force Survey, August, 2025 report tarlan danin India ram pumah hna hmu lo (unemployed) chu 5.1% an nih thu leh NITI Aayog, September, 2025 report danin Mizoramah hna hmu lo 2.2% an awm mek thu a tarlang a. Hemi a nih avang hian zirlaite chu hmasawnna hrang hrang milin tun atangin an eizawnna turah ngaituahna an sen tan a tul thu a sawi. Mizorama thar chhuah, ram danga thawn chhuah tlak thil tha tak tak siam thei turin tuna zirlai lehkha thiam tak takte chu rilru seng a, Co-operative movement lama hma la tan turin a fuih nghal a ni. Central lamin Mizoram State University din turin an rawn tih mek tawh thu tarlangin kum hnih hnu lamah chuan din hman ngei thei tura hma an lak mek thu a tarlang bawk.

Zirlaite chuan Mizo thalai tam tak nun thichhetu, ruihhlo kan do a tul takzet thu sawiin sawrkar chauh chuan a do theih loh thu a sawi a. Tunah pawh khaw 22 -ah police duty tur an dah thar tawh thu tarlangin ruihhlo do na kawngah hmalak pui turin zirlaite, thalaite leh mipuite chu a sawm nghal a ni.

Khual zahawm, Pu Jeje Lalpekhlua pawn ruihhlo kan do tlan a pawimawh thu sawiin Excise Department record danin kum 1984 atanga tun kum thleng hian ruihhlo vangin mi 1895 in nunna an chan tawh tih a tarlang a. Ruihhlo in inchhungkhur a tihbuaite an awm tawh loh nan zirlaite chu pui turin a sawm nghal a ni. Zirlaite chu eng kawng pawh zawh se, harsatna leh beidawnna an la hmachhawn vek tur thu sawiin chutah chuan beidawn loh hi a pawimawh ber thu a sawi a. Hlawtlinna chang turin tun atangin zir sang satliah nih tum lova, chhawr tlaka lehkha zir theuh turin a fuih a ni.

MSU General Conference vawi 23-na, Palai lawm programme hi Pu Lalruatpuia, Asst. General Secretary, MSU chuan a kaihruai a, naktuk chawhma lamah rorel inkhawmin a chhunzawm ang. Conference hi October ni 10 zan thleng neih tura ruahman a ni.