GAD Principal Secretary Pu Sudhir Kumar leh Vigilance Secretary Dr YLN Reddy te'n Lunglei an tlawh

Hnahthial Post | October 13, 2025, Hnahthial: October ni 11 - 13, 2025 inkar chhung khan Mizoram sawrkara General Administration Department (GAD) leh Environment, Forests & Climate Change (EF&CC) Department Principal Secretary Pu Sudhir Kumar leh Vigilance Secretary Dr YLN Reddy te chuan Lunglei an tlawh a. Lunglei District Bawrhsap Pi Navneet Mann hovin District Administration hotute'n lo dawngsawngin, inkawm hona hun an hman bakah, Lunglei District chhunga hma lakna hrang hrangte a hmunah an tlawh.

Principal Secretary leh Secretary te hian vawiin khan Lunglei DC Conference Hall-ah sawrkar department hrang hrang hotute nen Lunglei District chhunga sawrkar hma lakna hrang hrang kalpui dan an thlir ho va. Bawrhsap Pi Navneet Mann chuan Lunglei District chanchin tlangpui leh sawrkar ruahmanna leh hma lakna hrang hrang kalpui dan te a lem nen sawi fiahin, department hrang hrang hna thawh chungchanga Principal Secretary leh Secretary te'n hriat duh an neihte chu department hotute'n an sawi fiah bawk a. Principal Secretary leh Secretary te chuan Lunglei District-a chak zawk leh hlawhtling zawka sawrkar hma lakna kalpui a nih theih nana rawtna an neih hrang hrangte tar langin, District thuneitute leh department hotute chu theih tawp chhuaha ram rawngbawl hna thawk zel turin an chah.

EF&CC Principal Secretary Pu Sudhir Kumar leh Vigilance Secretary Dr YLN Reddy te hian nimin khan Tlawng Reserved Forest huam chhunga LAD enkawl Lunglei District Park leh Tlawng Riverine Reserved Forest huam chhunga Zobawk Mini Sport Complex te tlawhin, a dinhmun an enfiah a. Vawiin khan Lungleia Forest Office leh Nursery te, Wood-based Industry leh Horticulture Farm te tlawhin an enfiah bawk.