Chief Minister-in Serchhip MJA Silver Jubilee lawmna hmanpui

Hnahthial Post | October 13, 2025, Hnahthial: Vawiin khan Serchhip District MJA te chuan an pawl din cham kum 25-na, Silver Jubilee an lawm a. Bialtu MLA Pu Lalduhoma, Chief Minister chuan a telpui a. Jubilee lungphun a hawng a. Pu K. Sapdanga, Home Minister chu khualzahawm a ni.

A lawmna inkhawm hi Kawnpui VC Hall-ah buatsaih a ni a. He inkhawmah hian Chief Minister chuan, India ram danpui Fundamental Rights-ah chuan “Right to freedom of speech and expression” tih a chuang kalh mai a. Supreme Court chuan hei hian Right to freedom of Press a huam a ni tiin a hrilhfiah (interpret) nghe nghe. Democracy venghimtu pawimawh a nih avangin the Fourth Pillar of Democracy an ti thin.

Sorkarin a hmalaknate mipuite hnena hrilhhriatna hmanruaa a hmang ang bawkin, mimal, pawl leh kohhran te, political party te pawhin an thu leh hla puan chhuah nan an hmang a. Mipui aw a nih rualin mipui beng leh mit a ni nghal a. Mi zawng zawngin kan hmang tangkai vek mai a ni. Chutiang taka ram inrelbawlnaa hmanraw pawimawh a nih thin avang chuan Journalist ten khawtlangah dinhmun sang tak in luah a, sorkar pawhin a dah sang thin. Anmahni enkawltu tur Deparment dinin, an tana hamthatna awm thei chite a siam a. Accreditation a pe a, Advertisement rate a siamsak a, Press Tour te a buatsaihsak a, thihna an tawhin ralna tha tawk tak a pe a, tun hnaiah Pension Scheme a siamsak ta zel a ni.

Accredited Journalist te hi chu dawt leh thu belhchian dawl lo thehdarh turah kan ngai ngai lo che u a. In sawi hi chu kan ring mai thin. Tunah phei chuan social media a chakin a rang si a, mitinin a thehdarhna hmanrua kan hum fur mai a. Thu leh hla a darh chum chum a, thu dik leh dik lo hriat hran a har thin hle. Mite ngaihtuahna hruai sual thei thu thehdarh pawh a tam tial tial a. Politics lama kan inbeihna tawngkam leh comment tam takte phei chu chhiar hrehawm khawpa mawi lo a tam sawt hle. Hetianga social media lama thu belhchian dawl vak lo thehdarh chingte, tawngkam bawlhhlawh tak tak hmanga midang umzui chingte hi mi rawntlak leh chinchang hria an vang viau awm e. Tam tak phei chu mahni hming dik leh hmel tak pawh lantir ngam lo, tlanchhe chunga midang beih ching, mi dawihzep an ni. Social Media lamah chutiang chu a tam avangin mipuiten thu dik hrilhtu leh kaihruaitu tha an mamawh a. Nangni, kan MJA member leh accredited journalist te hi chutianga thu dik puangdarhtu, mipuite tana rinawm taka rawngbawltu ni tura ngaih in ni, a ti.

New Media hmanruate chu lo hmang thiam ve zel se tha a tih thu leh nitin chanchinbute nena inhnerem taka kalpui theih a that thu a sawi a, ram leh khawtlang tana rawng an lo bawl tawhnaah lawmthu hrilhin an kal zelna turah duhsakna a hlan a ni.

Khualzahawm Pu K. Sapdanga, Home Minister chuan Silver Jubilee Souvenir a tlangzarh bakah thusawina hun a hmang a. Journalism tha lehzual kalpui tura Journalist ten hma an lak a pawimawh thu sawiin, kan hmaa Golden Jubilee lo la thleng tur thlir phaka ke kan pen a tul a ni, tiin Serchhip MJA member te a fuih a ni.

Mumal taka kal Serchhipa chanchinbu hmasa ber chu Lenkawl niin kum 1981 khan Pu Remmawia Kawlni in a din a. Kum 1993-ah Ramlai Arsi a lo chhuak ve leh a, kum 2000 chhovah an lo pung ta a. Serchhip District Journalist Association an din a, kum 2006-a Mizoram pum huapa MJA an lo inchhunfin khan anni pawh an inchhunglut ta a ni.

A hawnna inkhawm hi an Vice President Pu Kapliana Pachuauin a kaihruaia, President Pu C. Lalhminghlua leh MJA General Headquarters aiawhte pawhin thu an sawi a. An member boral tawhte sunna an hmang bawk.

Tunah hian Serchhip district MJA member hi 14 an ni.