India rama Sawrkar Damdawi In ṭha tehnaah PHC pahnih tling thar

Hnahthial Post | October 13, 2025, Aizawl: India rama sawrkar damdawi in ṭha bik tehnaah Primary Health Centre pahnih an tling thar leh a, heti hian Mizoram chhunga HWC-PHC 57 target awm zinga 36-in National NQAS certificate an nei tawh a ni.

Dr. Lily Chhakchhuak, Mission Director, National Health Mission, Health & Family Welfare Department chuan India rama sawrkar damdawi in ṭha bik tehna, National Quality Assurance Standards (NQAS)-a tling thar Sialsuk PHC leh Suangpuilawn PHC te hian a tehnaah 90.06% leh 93.14% te an hmu tih a sawi a. Heti hian Mizoram chhunga Sawrkar damdawi in 49 te chu NQAS national certificate nei tawh an ni a. Tunah hian sawrkar damdawi in 18 leh HWC Sub-Centre 21-in state level certificate nei mekin national certificate result nghak mek PHC 3 an awm bawk a ni.

National Quality Assurance Standards (NQAS) certified damdawi in te hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn aṭangin Assessor an lo kal ṭhin a ni. Hetah hian 70% an hmuh chuan certified an ni chauh ṭhin. Heng certified tawh damdawi inah te hian natna darh thei ven kawngah te, thawktu zawng zawngte an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi in faina leh dik taka damdawi in bawlhhlawh sawngbawl te, hawihawmna leh a chhehvel vawnfai kawngah te, environment vawn ṭhat kawngah te endik an ni.

Health Minister Pi Lalrinpuii chuan India rama Damdawiin tha tehna a tling thei tura thawktu Dr. C. Lalhmangaiha, MO, Sialsuk PHC leh Dr. Lalrinsangi, MO, Suangpuilawn PHC leh an naute thawhrimna chu fakawm a tiin lawmthu a sawi a. Heng NQAS certified sawrkar damdawi in 49 kan neih tak te hi mipuite’n tangkai taka an hman a duhsak a, mipuite pawhin tangkai taka hmang turin a chah bawk.