Hnahthial Post | October 1, 2025, Aizawl: Vawiin khan Health & Family Welfare leh Social Welfare, Tribal Affairs, Women & Child Development Department Minister Pi Lalrinpuii chuan khawvel huap Upa Te Ni puala inkhawm Chanmari YMA Hall a neih chu khuallian niin a hmanpui. He programme hi National Programme for Health Care of the Elderly (NPHCE) leh Social Welfare Department tangkawp a buatsaih a ni.
Health Minister chuan khawtlang tana kum upate an hlutna sawiin, aia upate zahna leh chawimawina nun kan chhawm tlan vek a pawimawh thu a sawi a. Sorkar pawhin kum upate a ngaipawimawh thu leh kawng hrang hranga hma a laksak dan a sawi a. Sorkar laipui thupek angin district hospital tinah geriatric bed (kum upate mutna tur khum) sawm (10) dah tura tih a nih angin ruahmanna siam a nih thu a sawi a. Old Age pension chungchangah pek tlai avanga harsatna awm sawifiahin, state sorkarin a tih tur chin ti mahse sorkar laipui atanga dawn a tlai thu leh, old age pension chauh nilo scheme dang hrang hrang nen a hlawm a lo kal a nih avangin a ruala pekchhuah theih hun nghah a tul tak thu a sawi.
Minister chuan Pi Lalrinpuii chuan khawvel pumpuia upa te an pun chhoh zel thu sawiin, hei hian damdawi lama inenkawlna tha zawk mamawhna a thlen tel thu a sawi a. Chumi atan chuan Mizoram Universal Healthcare Scheme hnuaiah ruahmanna tha tak siam a nih thu leh, private mai bakah kohhran hospital hrang hrangin an zawm belh mek thu a sawi a. Kum upa golden card nei te chuan sorkar hospital ah chauh hman theih thin kha tunah chuan MUHCS zawmtu private hospital ah chuan a hman vek theih tawh thu a sawi.
Kum upate tana hmalakna hrang hrang zingah MUP multipurpose centre sak mek te, Recreation Centre dinntura hmalak mek a nih thu te, kum upate enkawlna hmun Ainawn Veng a siam mai bakah district hrang hrang siam tura hmalak mek a nih dan te a sawilang a. National Health Mission hnuaia NPHCE chuan SWD nen tangkawpin dist hrang hranga physiotherapy camp te buatsaihin campaign vawi tam tak buatsaih a lo ni tawh thin thu a sawi bawk.
Khuallian hian vawiin Upate Ni pual inkhawm ah hian Kum 100 tling mipa 3 leh hmeichhia 9 hnenah lawmpuina thilpek a hlan a ni.
He inkhawm hi Social Welfare Director Pi Lalzarmawii chuan kaihruaiin, khawtlang a kum upate tangkaina leh pawimawhna te a sawi a. Dr. Eric Zomawia hnen atangin kum upate tana inenkawl dan tha ngaihthlak niin, MUP President Pu Nghaklianmawia leh MHIP President Pi Lalliani te 'n thu an sawi bawk.
Tags
News