“Kohhran leh khawtlang rawngbawlna ngaih pawimawh vanga siikul kal tlai, ban hun hma a haw leh class lak thulh hi awm tawh lo se, rawngbawlna lama kan tui a nih chuan inhmang tlang law law zawk mai rawh u” – Dr Vanlalthlana, School Education Minister


Hnahthial Post | October 1, 2025, Aizawl: School Education Minister Dr. Vanlalthlana chuan vawiin khan Synod Conference Hall, Aizawlah Mizoram Secondary School Teachers’ Association (MISSTA) Silver Jubilee lawmna leh General Conference, 2025 neihna ah telpuiin zirtirtu kalkhawmte chu “Kohhran leh khawtlang rawngbawlna ngaih pawimawh vanga siikul kal tlai, ban hun hma a haw leh class lak thulh hi awm tawh lo se, rawngbawlna lama kan tui a nih chuan full-time in inhmang tlang law law zawk mai rawh u” tiin a chah a, rawngbawlna in zirna tibuai lo se a duh thu sawiin, Headmaster te pawh discipline tha taka keng kawh turin a chah nghal bawk.


Minister chuan MISSTA Silver Jubilee Monument hawngin Silver Jubilee Magazine a tlangzarh nghal bawk a. MISSTA member te duhsakna hlanin thawhhona tha tak nei zel turin a chah a, Sikul tihchangtlunna tura sawrkarin hma a lak mek leh hma a lak tawh dante a sawilang bawk a.Zirtirtu indaihlona leh non-teching staff indaihlohna ti ziaawm turin theihtawp an chhuah mek thu a sawi bawk a ni.


MISSTA Silver Jubilee lawmna leh General Conference, 2025 hawnna inkhawm hi MISSTA Vice-President Pu VR Vulmawia’n a kaihruai a, MISSTA General Secretary Pu Azaria Laltinkima’n report a pe a, MISSTA President Pu C. Lalremruata’n thuchah a sawi bawk a ni.


He hunah hian MISSTA member pensioner te thlahna hun leh State Awardee te chawimawina hun hman niin, hruaitu hluite chawimawina hun hman a ni bawk.


Chawhnu lamah an member boralte sunna hun leh rorelna hunh man a ni.
















Post a Comment

Previous Post Next Post