Hnahthial Post | October 10, 2025, Khawmawi: Vawiin khan Mizoram Bawm Student Association chuan Khawmawi Playground-ah Bawm hnam kut Tlanglut Kut lawmna leh 2nd International Bawm Cultural Meet an buatsaih a. Chief Minister Pu Lalduhoma chuan Kut Pa niin a telpui a. Khawmawi bialtu MLA Pu Lalramliana Papuia chu khualzahawm niin, Dr. Lorrain Lalpekliana Chinzah chuan Chief Minister hi a tawiawm.
Thusawii Chief Minister chuan, Zo hnahthlak hnam peng hrang hrangte hian an hnam huikhawmtu, an unau hnam peng dangte nunphung leh tih dan zah thiam a, zofate inpumkhatna ngaihlu tak si kan mamawh vek a. Bawm Student Association hi chutiang rilru pua Bawm unaute huikhawmtu chu a ni. Mizoramah mai ni lovin Bangladesh lamah pawh Bawm Student Association hi tha takin an ding a, Bawm hnam tan an hlu a ni. Bawm hian hnam peng chi sawmruk vel zet a nei chungin Panghawi leh Sunthlate hi an lian fal a, hlawm hnih anga sawi in ni ta ber a. Kutpui pawh a hran nei mahse Bawm zawng zawngte hman tlan Tlanglut Kut ngei behchhana Bawm International Cultural Meet in buatsaih hian Mizoram Bawm Students Association-in unau inpumkhatna in ngaihpawimawhzia a tilang a ni, a ti.
Bawm hian history-ah lal ropui tak a nei a, Vanhnuaitlir a ni. Ani hian a vanglai chuan tuna Paletwa leh a chhim lam ram zau tak a awp nia sawi a ni a. Chuti taka lal chak leh thiltithei a nih chhan chu a unau hnam peng sawm leh pathum zet a thawhpui vang a ni. Ani khan tanrual hi chakna a nihzia min lo zirtir tawh a. A tih dan entawna vawiina Zofate hi kan tanrual thiam chuan kan awmna hmun theuhah hnam chak leh thiltithei tak kan ni zel ang. Kan tanrual thiam loh erawh chuan hnam zuamawm tak kan ni thung ang. Chu chu kan hriat avangin Mizoram mipuite hian hnam peng anga inlakhran tumna hi kan lawm lo va, kohhran huanga sengluh pawh tha kan ti lo. Kan hnamziate chu kan humhalhin kan venghim tur a ni a, hnam peng dangte zia leh tihdan pawh Mizo hnamzia a ni tih kan pawm mai tur a ni. Israel hnam sawm leh hnam hnih zingah tumah Israel hmingpu an awm lo va, hnam sawmpahnihte awm khawm kha Israel hnam chu an ni mai. Keini pawh tumah Mizo hnam hmingpu bik kan awm lo va, Zo hnahthlak hnam hrang hrangte awm khawm hi Mizo hnam chu kan ni mai. Tha taka kan insuihkhawm theih nan Pathian pawhin min kaihruai tih kan hre thei. Kum reilote chhungin zofate hi kristian kan ni deuh vek a, rinna thuhmun vuanin duh thuhmun leh tum thuhmun neiin min siam a ni, a ti.
Zirlaite chu zirna ngaihlua, khua leh tui tha, ram leh khawtlang tana chhenfakawm nih tum theuh tura chahin, kan ram hi keimahni ngeiin kan tihmasawnin kan siamtha tur a ni a, chutiang ti thei tur chuan zirna hian hriatna leh thiamna min pe a ni, tiin zirna uar turin a chah a. Mizoramin hmasawnna hmel thar a hmuh te tarlangin rel kawng hi Hmawngbuchhuah thlenga kaltir turin sorkar laipui chuan hma a la a, KMMTTP pawh hman ni lawka a thawktu company hotute min hrilh dan chuan 2027 a thawh zawh an tum. Heng ruahmannate a puitlin hunah chuan chhim lam bial hi a changkang chak hle dawn a ni, a ti bawk.
Pu Lalramliana Papuia, bialtu MLA pawhin thu sawiin Chief Minister-in a bial a tlawhsak avangin lawmthu a sawi a. Kut hmang tura lokal mai ni mahse Khawmawi hian kan khawtlang mamawhna thilah kan chhawr ngei dawn a ni, a ti.
Zingkarah Chief Minister hian Khawmawi khawtlang hruaitute kawmna a nei a, mobile phone signal tha an mamawhna te, an khaw ram Hmeithai tlang panna kawngpui tha an mamawh thu te, Community Hall an mamawhna leh Thlasik thlai chinna hmunpui an nih anga collection centre an mamawh thute an thlen a. Chief Minister hian heng an mamawh thilte hi a bawhzuisak tur thu a hrilh a ni.
Tlanglut Kut inkhawm hi Pu B. Lalramchhana, Vice President, MBSA in a kaihruai a, Vanlalpianmawiin hunserh hmangin Pu Stephan Rutland, President, MBSA chuan thusawiin Pu Remrikhuma, GS, MBSA chuan report a pe thung.
Mizoramah hian Bawm hi mi 30000 vel an awm niin an sawi a, LADC chhungah leh CADC chhungah an awm tam ber a, LADC ah hian Lai dawta hnam peng lian ber nia sawi an ni. Bangladesh atanga himna zawnga rawn raltlan hi mi 2500 vel an awm bawk.
Tags
News