Health Minister-in 12th Mizoram State Anti-Tobacco Day 2025 pualain Tobacco Free Youth Campaign 3.0 hawng

Hnahthial Post | October 31, 2025, Aizawl: Vawiin khan Health&Family Welfare Department Minister Pi Lalrinpuii chuan Directorate of Health&Medical Education Auditorium, MINECO-ah 12th Mizoram State Anti-Tobacco Day 2025 puala, ‘zuk leh hmuam tel lo nundan changkang’ tih thupui hmanga buatsaih Tobacco-free Youth Campaign 3.0 chu khuallian niin a hawng.

Hawnna inkhawmah hian khuallian Health Minister Pi Lalrinpuii chuan thusawiin, TFYC-in a tum ber chu Mizorama khuate leh zirna ina tam thei ang ber vaihlo leh a kaihhnawih awm lohna hmuna siam tura hmalak a ni tih a sawi a. Department zirchiannain a tarlan danin, ruihhlo ngawlvei tam ber chu zuk leh hmuam atanga bul tan an niin, Middle School naupangte zingah paw zuk leh hmuam leh damdawi tite hial pawh an awm tih Minister chuan a tarlang a. Zuk leh hmuam tih chuan rilru leh taksa hriselna a nghawng mai bakah kan chheh vel boruak leh mimal leh chhungkaw sum enkawldan thlengin, nitin nun a nghawng tak zet tih a sawi a. Anti-Tobacco Day pualin vaihlo leh a kaihhnawih do kawngah chuan mahni zawn theuhva theihtawp chhuah zel turin kalkhawmte chu a chah nghal bawk a ni.

Vawiina Tobacco Free Youth Campaign 3.0 hawnna hun hi Pi Lalnunmawii Ralte, Jt. Secretary, Health&Family Welfare Department chuan kaihruaiin, kalkhawmte lawmna thu a sawi a. Dr. Zoramthangi, State Nodal Officer, National Tobacco Control Programme (NTCP) National Health Mission-in thupui sawizauna a nei a. Pi Angela Zothanpuii, School Education Department Director chuan zuk leh hmuam tel lo zirnain tih thupui hmanga thusawiin, Pu K. Lalrohlua, Director Rural Development Department chuan zuk leh hmuam tel lo khawtlang tih thupui hmangin thu a sawi a. Hemi zawh hian Pi Lalbiaksangi, Treasurer, Indian Society on Tobacco and Health, Mizoram kaihhruaiin kalkhawm ten TFYC puala thutiam chham rualna hun an hmang a. Dr. Lili Chhakchhuak, Mission Director, National Health Mission, Mizoram chuan lawmthu sawiin hun hi a khar a ni.