Home Minister-in Sairang Railway Station-a zin mite dawnsawn an nih dan a endik

Hnahthial Post | October 14, 2025, Hnahthial: Tukin khan Pu K.Sapdanga, Minister, Home Department chuan Sairang Railway Station-a rel a lo luh hnu a State pawn atanga zin mi lo lutte dawnsawn an nih dan chu a hmun ah kalin a endik a. Pu TBC Lalvenchhunga, Adviser to Chief Minister, Pu Khilli Ram Meena, Chief Secretary, Pu Sharad Agarwal, DGP, Secretary, Home Department, Secretary, ICT Department, Transport Department aiawhte, Aizawl DC leh SP-te an tel a. Pu Harjimal Meena, Deputy Chief Engineer, Construction, NF Railways chuan Sairang Railway Station-a zin mite dawnsawn an nih dan leh changtlung zawka thawmthat a nih theih nana hmachawp la awmte a tarlang a ni.

Home Minister Pu K.Sapdanga chuan rel hmanga inkalpawhna kawnga hmasawnna a thlen mek rualin zin mite dawl zo tur leh harsatna an neih lohna turin Sairang railway station pawh buatsaih zel a pawimawh thu a sawi a. State pawn atanga rel hmanga zin mi lo lut ten Inner Line Permit la chhuak tura rel station-a rei tak intlar ngai thin chu chinfel vat a tul thu sawiin, Mizoram mi leh sate leh ILP dil chawp ngai lote tan chhuahna hran buatsaih vat turin NF Railway thuneitute chu a hrilh.

Home Minister-in Sairang Railway Station-a tlawhna hunah hian, tun dinhmuna ILP pekchhuah leh endikna kalpui dante a enpui a, Sairang Railway Station tih changtlun zelna tura ruahmanna la awmte chu NF Railways-a thawktuten sawifiahin an entir bawk a ni. He huna tarlan danin, rel a lo thlen hian zin mi 250 atanga 300 vel chu Sairang Railway Station-a chhuk an awm thin thu sawi a ni a. Transport Department ruahmannain Sairang leh Aizawl inkar tlan tur, MST Bus pahnih dah a ni tawh a, chuan man hi mi pakhat tan Rs. 80 a ni. State pawn atanga lo lut, zin miten ILP dil a hun rei tak an hman loh nan Online-a dilna siam a nih bakah rel chhungah ILP dilna form semchhuah theih tura ruahmanna siam tur a nih thu tarlan a ni a. Tuna hman mek, Online ILP Guidelines Version 2 chu siamthat mek niin awlsam zawka dilna buaipui zung zung a nih theih nan Version 3 pawh peihfel tep a nih thu tarlan a ni. Sairang Railway Station-ah hian zin mite kaihruai a, Mizoram hmun nuam leh thlawh tlakte lo kawhhmuh zung zung thei tur Tourist Facilitation Centre ruahman a tul thu sawi a ni bawk.