Hnahthial Post | October 6, 2025, Serchhip: Vawiin khan Mizoram State Legal Services Authority Executive Chairman Hon’ble Mr. Justice Nelson Sailo, High Court Judge chuan Thenzawl, Chhiahtlang leh Chhingchhip Legal Aid Clinic a hawng.
Justice Nelson Sailo chuan thusawiin dan hi hriat tawk a awm thei lova nitina inzir thar reng ngai kan ni a ti a. Mitinin kan chanvo kan chan ngei theih nan Legal Aid Clinic hi buatsaih a ni a, mipui mimirin dan leh hrai kaihhnawih thurawn an lak theihna tur leh, harsatna leh mamawhna an neih apianga an pan theih tura hawn a ni, tih a sawi. Puih ngai tupawhin inthlahrung lova engtik hunah pawh Legal Aid Clinic te hi pan thin tur leh khawtlang hruaituten tangkai taka hmang turin a chah a ni. Para Legal Volunteer ten an vil dawn a, amaherawhchu anmahniah ringawtah innghat mai lovin khawtlang hruaitute ten theihtawp an chhuahpui chuan khaw nuam kan ni ngei ang a ti bawk.
Hawnna inkhawmah hian Mizoram SLSA Member Secretary Pu Vincent Lalrokima, MJS chuan thu sawiin, Legal Aid Clinic chu mipuite tan malsawmna a nih ngei an beisei a, tangkaina tam tak a nei dawn a ni a ti a. Mizoram sawrkar hian Mizoram State Legal Services Authority bakah district tinah District Level Services Authority a din a. Eng hawi zawng pawha tanpui ngaite tanpui tura theih tawp chhuah hi an dinchhan a ni tih a sawi. Mipuite tan theihtawp an chhuah a, khawtlang hruaitute nen hian an thawkho vek a ni a tih sawiin, Legal Aid Clinic hi tu tan pawha pan theih a nih thu hre thar theuh turin a sawm a ni.
Justice Nelson Sailo hian heng khaw pathum te hman tangkai atan Silpauline leh Emergency light thahnem tak Village Council te hnenah a hlan a. Mizoram State Legal Services Authority Member Secretary Pu Vincent Lalrokima leh Serchhip District Legal Service Secretary Josangzeli Tlau ten Judge hi an tawiawm a ni.
Tags
News