Hnahthial Post | October 6, 2025, Lunglei: Vawiin khan Lungleiah Environment, Forests & Climate Change (EF&CC) Department hnuaia Lunglei Forest Division huaihawtin "Mihringte leh nungchate inhne rem taka khawsak ho" (Human-Animal Coexistence) tih thupui hmangin India rama Nungcha Humhalh Chawlhkar (National Wildlife Week) vawi 71-na pualin hun hman a ni.
National Wildlife Week 2025 pual hian zingkarah kea kawng zawh (walkathon) buatsaih niin, Lunglei District Superintendent of Police Pu J. Lalmuankima chuan kawng zawh hi a vai liam a. Police, 92bn Border Security Force (BSF), 152bn BSF, 20bn Assam Rifles, YMA Bazar Branch, EF&CC leh department danga thawkte leh mimal ṭhahnem ngai kal khawm mi 200 velin nungcha humhalh inzirtirna thu tlangaupuiin, Lunglei Chanmari aṭanga Bazarvenga Forest Complex-a Buannel Run thlengin kawng an zawh a ni.
Chawhnu lamah Government J. Buana College Multipurpose Hall-ah Lunglei Divisional Forest Officer Pu Solai Azyu kaihhruaiin National Wildlife Week lawmna hun buatsaih a ni a. Lunglei District Superintendent of Police & Wildlife Crime Control Sub-Unit Chairman Pu J. Lalmuankima chu khuallian a ni.
Khuallian Pu J. Lalmuankima chuan Mizote thinlungah pasalṭha ngaihsanna a intuh nghet hle tih sawiin, mihringte leh nungchate khawsak hona leh hma lam hun atana pawi lo zawnga pasalṭhat dan inzirtir a ṭul thu a sawi a. Nungchate enkawl chungchangah hawihhawm leh rilru nei taka kalpui a ṭul thu te, ngaw leh luia nungchate man leh lak dawn pawhin danin a phal chinah chauh ren tak leh inkhawl khawm zel thei tura mahni mamawh chin chauh lak leh hman te chu inzirtir uar a ṭul thu a sawi a. Khawvel hmasawnnain langsar tak leh lang lo lamah pawh chhehvel thil leh nungchateah nghawng pawi tak a nei ṭhin tih sawiin, chumi pumpelh tur leh veng tur chuan ṭan lak a ṭul thu a sawi a. Pasalṭha ngaihsanna rilru pu a, silai lawm deuhte pawh nungcha ni lo, inthem thiamna tur (target) tara kap zawk tur te, infiamnaa hming ṭhatpui tham law law tum tur te'n a chah.
UPC (NEI) Zobawk bialtu pastor Rev. Jerry Lalmuanawma'n hunserh a hmang a. Lunglei Government College-a Zoology Department-a Associate Professor Pu R. Lalrochama'n mihring leh nungchate inrem tak leh intibuai lova khawsak ho theih nana thil pawimawh hrang hrang a lem nen a zirtir a. Lunglei Sub-Headquarters YMA Secretary Pu Zothanzuala Hnamte chuan lawm thu sawiin hun a khar.
He hunah hian sawrkar official-te, Govt J. Buana College-a zirtirtu leh zirlaite leh tlawmngai pawl ai awhte an tel.
National Wildlife Week hi India ramah kum tin October ni 2 aṭanga October ni 8 inkar chhungin hman ṭhin a ni a. Kumin hian Lunglei District hmunpuia hman a nih bakah hian, Lunglei Forest Division hnuaia Range Headquarters leh Hnahthial District Headquarters-ah te hman a ni bawk a. Nungcha humhalh inzirtirna thuziak te tarin, zirna in hrang hrangah inzirtirna (wildlife awareness) programme buatsaih a ni a. Week chhung hian EF&CC Department-a thawk (field staff)-te chu ngawrh lehzualin an duty reng bawk a ni.
Tags
News