Hnahthial Post | October 6, 2025, Lunglei: October ni 5 aṭanga ni 12, 2025 inkar chhunga Right to Information (RTI) Week hman mek pualin vawiin khan Lunglei DC Conference Hall-ah Additional Deputy Commissioner Pi Rochuangkimi Khenglawt hovin hun hman a ni.
Lunglei Addl DC Pi Rochuangkimi Khenglawt chuan RTI Act chu sawrkar inrelbawlna leh hna thawhna kawnga mipui chanvo siamsaktu, lang tlang leh felfai taka sawrkar a kal theihna tura hmanraw pawimawh tak a nih thu sawiin, mipuite hriat duh angte dik tak leh a hun taka pek chhuah chu sawrkar hna thawkte tih tur a nih thu a sawi a. Sawrkar hna thawh dan leh inrelbawlna chungchanga thu thang dik lo theh darh tam tak chu thil hre chiang lo leh finfiah hmasa lova theh darh a tam vang a nih thu sawiin, chumi pumpelh tur chuan RTI hman ṭangkai a pawimawh thu leh mipuiin RTI an hman tam theih nan inzirtir uar a pawimawh thu a sawi a. RTI chu sawrkar hna peng pakhat ve reng a nih angin phurrit leh ninawma lak loh tur a ni tiin, RTI chu online leh offline-a a kal kawp tawh avangin uluk lehzuala vil turin sawrkar office hrang hranga RTI kaihhnawiha mawhphurtute a chah.
Lungleia RTI Week 2025 puala hun hman hi Lunglei Sub-Deputy Commissioner Pi Lalhlimpuii Pachuau chuan kaihruaiin, BCM Social Concern Department Director Rev. RC Lalthanzama'n hunserh a hmang a. Lunglei District Information & Public Relations Officer & RTI District Resource Person Pu C. Lalhruaitluanga chuan powerpoint presentation hmangin RTI Dan (Act & Rules) leh a chungchanga hriat tur pawimawh hrang hrang a zirtir a. Zawhna leh chhanna leh sawi hona hun hman a ni bawk.
Lungleia RTI Week puala hun hmanah hian sawrkar office hrang hranga Departmental Appellate Authority (DAA), State Public Information Officer (SPIO), State Assistant Public Information Officer (SAPIO) leh RTI lama mawhphurtute, tlawmngai pawl ai awhte leh RTI hmang ṭangkai ṭhintu (activist)-te an tel.
Tags
News