KVK Lunglei District, Hnahthial chuan Prime Minister Dhan Dhaanya Krishi Yojana (PMDDKY) hawnna programme chhim

Hnahthial Post | October 12, 2025, Hnahthial: Nimin (11 October) khan KVK Lunglei District, Hnahthial huaihawtin KVK Training Hall-ah PMDDKY scheme hawnna programme chhimin scheme awmzia thlirhona hun, kuthnathawktute leh SAS zirlaite nen an hmang a. District Agriculture Officer (DAO), District Horticulture Officer (DHO) , School of Agricultural Sciences (SAS) Principal leh VCP South-III Hnahthial ten he programme hi an hmanpui a ni.

He hunah hian Senior Scientist & Head, Dr. Henry Saplalrinliana chuan PMDDKY scheme awmzia leh hemi scheme hnuaia hmalak dan tur hrang hrangte chu a sawifiah a. Pu Timothy Lalrinfela, SMS (Soil Science) chuan kalkhawmte chu Natural Farming leh Biofertilizers hman dan chungchang a zirtir bawk a ni. He hun hmanna pui ber, NASC Complex, New Delhi-a Prime Minister, Pu Narendra Modi thusawi lai pawh Live in thlir ho a ni.

He programme hi Dr David Malsawmdawngliana, SMS (Animal Science) chuan kaihruaiin Pi Julie Zodinpuii, DAO; Pu K. Lalchhuanmawia, VCP Hnahthial South-III bakah Pi Mary Lallawmkimi, Vice Principal SAS te pawhin thu an sawi a ni.

PMDDKY chu tun kum July ni 16 khan approve niin lo neitute tana duan a ni a. India ram State hrang hrangah Agriculture chawikanna hmun tur District 100 thlan chhuah niin chung atan chuan kum ruk(6) chhung, kum tin cheng vbc 24,000 dah a ni a. "Saturation based Convergence" niin Ministry hrang hrang 11 hnuaia Scheme awmsa 36 te chu he scheme tihhlawhtlin nan hian hman tangkai an ni ang.