Land Revenue & Settlement Department Minister, Pu B Lalchhanzova'n Hnahthial District tan Revenue Office a hawng

Hnahthial Post | October 31, 2025, Hnahthial: Minister of State for Land Revenue & Settlement Department, Pu B. Lalchhanzova chuan Hnahthial Deputy Commissioner Office-ah Revenue Office hawngin Hawnna Programme-in a chhunzawm nghal a, Licensed Surveyor nei turin hma an lak mek thu a tarlang. Bialtu MLA, Pu Jeje Lalpekhlua chuan khual zahawm niin thusawina hun a hmang a, programme hi Bawrhsap, Pi K. Vanlalruati'n a kaihruai a ni.

Minister chuan Hnahthial District-ah Revenue Office hawn a ni thei ta chu hmasawnna ropui tak a nih thu sawiin khaw mipuite leh hnathawktute thawhrimna zar a nih thu a sawi a. Mipui tam takin Revenue Department an sawiselna pakhat, dawr nuam lo an tih thinna chu hriain tunah chuan khami kawngah nasa takin hma an sawn tawh thu a sawi a. Dawr nuam tak department an nih zel theih nan tan an lak thu a sawi bawk.

Hnahthial tan Revenue quarter sak mek a nih thu tarlangin Vairengte-ah te pawh pilot project angin special deuh hleka ruahmanna an siam mek thu a tarlang a. Online File Tracking System, mahni awm hmun atanga File thlen chin hriat theihna tur chu bawhzui mek niin hei hian File hup bo, File tang leh tih bo tam lutuk a tihreh an beisei thu a sawi a ni.

Minister chuan State dangin an ngaih pawimawh deuh pakhat chu District Land Revenue a nih thu leh chu chu keini state tan ngat phei chuan sum hai luhna pawimawh tak a nih thu a sawi a. Chuvang chuan mumal zawka chhiah lak luh a nih theih nan Land Revenue reforms siam turin tunah dan thar an ennawn mek thu a tarlang.

An hmachhawp lian tak pakhat chu Licensed Surveyor neih a nih thu tarlangin chung Licensed Surveyor-te chu ram teh leh a tul apiangah, rate mumal tak nena chhawr an nih tur thu a tarlang a. Heng licensed surveyor leh empanneled firm 13 an chhawr mekte hian indaihlohna tam tak an phuhruk a beisei thu a sawi a ni.

Hei bakah hian mipui dawrtute tan Customer Care Policy an duan mek thu a sawi a. Chutih rual chuan mipuite pawh thawktute ngaichang thiama, tul lova tibuai chhen thin lo thin turin a chah a. He Revenue Office, Hnahthial District tana hawn tak chu mipuite leh a thawktute hnenah neitu rilru pu chunga lo enkawl turin a chah a ni.

MLA, Pu Jeje Lalpekhlua chuan Revenue Minister hmalak tawhna te fakin sawrkarna an chan hnuah hmasawnna tam tak an hmuh tawh thu a sawi a. Hnahthial District mipuite harsatna tam tak phuhruk turin Revenue Office a in hawng ta chu lawmawm a tih takzet thu sawiin Minister leh thawktute chungah lamwthu a sawi a. Chutih rual chuan office lama thawktute pawh mipuite tana harsatna siamtu ni lova, mipuite harsarna chingfeltu ni zel zawk turin a chah a ni.

Pu Vanlalmawia, Secretary, LR&S chuan thuchah tawi sawiin Revenue Office chu District Administration nen chak taka thawh ho tir an tum thu a tarlang a. Chuvang chuan District thar pathumah chuan Revenue Office hran awm tawh lovin DC office-ah beh tir an nih tawh tur thu a sawi a. Ram chungchanga buaina tam tak awm thin chu a chinfel nan Revenue Court mumal tak nei tura rilru sen mek a nih thu tarlangin Settlement Officer (SO) chu Assistant Commissioner (AC) ti a hming thlak turin an buaipui mek thu a tarlang bawk.

Pu R. Lalthazuala, Director, LR&S hnen atangin Technical report ngaihthlak a ni a.

Hnahthial Revenue Office tana post siam zat chu :-

1. ADC/ASO :- Post 1

2. Surveyor - I :- Post 1

3. Surveyor :- Post 2

4.Revenue Assistant :- Post 1

5. LDC :- Post 1

6. Peon :- Post 1

Tun dinhmunah hian post 4 :- Surveyor-1, LDC, Revenue Assistance leh Surveyor post chauh hnawh khah rih an la ni. Settlement Officer (SO) charge hi Addl. DC, Pu Zothanmawia Khiangte chuan a la a ni.

Hnahthial Revenue Office a in dan tirh khan Lunglei Revenue Office atangin Land Pass 9223 sawn phei a ni a. Tunah hian application thahnem tak lut tawhin tun dinhmunah hian Hnahthial Revenue Office atangin LSC hming thlak panga(5) an awm tawh a. Hei bakah hian Periodic Patta renew Sawmnga pakhat (51), Land Survey zawh fel sawmthum pali(34) bakah LSC then fel pahnih (2) an awm tawh bawk. Application pending 805 a awm mek a ni.