Success story
Chanchinbu sem atangin IAS a inziak tling Nirish Rajput - Huna Kawlvawm
IAS toppers, a ti țha zual 10 chinte hi chu result chhuah ni 2/3 ah an chanchin chipchiar National newspaper lamah hmuh mai theih a ni ṭhin. Hlawhtling zinga dinhmun sang luah phak lo (rank hniam) zinga mi IAS ni tura nasa taka zir leh an lo chawr chhuahna chhungkua rethei tak te hi National newspaper lam tan pawh hriat leh ngaihven vat hleihtheih a ni lo. Hetiang mi biru entawn tlakte chanchin an chhuah ṭhin erawh a tlai deuh țhin.
UPSC CSE exam hlawhtling chanchin hi mi chi hrang hrang leh an chawr chhuahna chhungkua pawh an inthlau thei hle hlawm ṭhin. IAS nih tum (aspirant) țhenkhar chu pi leh pute aṭanga dinhmun ṭha, India ram chhunga zirna sikul ṭha ber bera lut chat chat thei, thawmhnaw chu sawi loha lum ni se, naupang tě an nih lai ațanga sikul baka mahni in lama zir belhna (home tuition) nen engkim mai nu leh pa ngaihtuahsak an ni fur hlawm a, India ram zirna ṭha IIT, IIM, NIT etc ațanga zir chhuak tam tak an awm. Hemi letling chiah hian țhenkhat thung erawh chu an thlahtute aṭanga retheihna khur thuk thim taka awm, an thlah leh chhungkaw zingah pawh ziak leh chhiar thiam mumal pawh awm lo, retheih luat avanga khaw pangngaiah pawh awm lo, an chenna in pawh dai pawn te, mi hausa ho huana chhawl buk te, pa nei tawh lo anuin inhlawh chunga a chawm te, hna hniam leh hmuhsitawm tak tak thawk, an pa cycle rickshaw khalha ei zawng te, kawng sira pheikhawk țhui, mi chhe awmna (slum area) a awmte an ni nawk thung. Heng mi rethei naupangte hian zirna sikul leh college ṭha chu an ban phak ngai dawn lo tih a chiang sa khawp mai. Amaherawhchu, mihringte Siamtu hian finna leh thiamnate hi mi hausa fate tan chauh a lo dah hlek loh avangin heng mi chhe daikil kar aṭang hian zirna kawnga hlawhtling UPSC CSE a hlawhtling kher lo, engineer, doctor, peng hrang hranga scientist, economist etc ni thei turin an zirna ti bahlah thei tur reng reng laka inthiar fihlim lui tlatin, incheina leh țhian kawm takngial pawh duh lo leh ngaihzawng neih leh social media buaipui ve hauh loin an tum ram thleng tura zir nasat a ngaih bikzia hmangin nitin an mahni an infuih a, nasa takin an zir a, a tawpah hlawhtlinna chu an sual chhuak țhin. Hetiang mahni tuma chiang tur hian kalsan leh tih loh tur tam tak a awm, chung zingah chuan mahni inkhawngaihna hi a chimawm ber awm e.
Vai chhungkaw rethei leh chenbeh tak tak ațang hian India rama zirlai hlawhtling tam tak an chhuak tawha, an la rawn chhuak zel bawk ang. Hlawhtlinna changte hi engtin emaw tak hlawhtlin theih bîk riauna thu rûk hria tumah an awm lo a, pumpelh kawng emaw sum leh paia lei theih a ni lo a, zir ṭha mang si loa, nasa taka țawngțai vak vanga thiam theih lah a ni hek lo. An rawn chawr chhuahna chhungkua chu hausa emaw rethei lutuk emaw pawh a ni thei. Retheihna hian hlawhtling turte kawng a kharsak thei chuang lo. Mi ṭhenkhat chu hausa tak chhungkuaa sei lian, nu leh pa lehhkhathiam ve ve, zirna kawnga fate tan rualawt a thiam tir ngei tum aṭang pawhin zirna lam ti ṭha duh lo, naupang tě an nih lai ațanga zirna lam kawng hawi aia nun heheu nuam ti tlat mi tam tak an awm. Nu leh pa țhahnemngaihna vang hian hlawhtlinna kawng a awm lo, a zirtu ngei tumna, țhahnemngaihna, hrat khawkhen ngei ngei a ngai. Delhi tlangval awm mai mai hi Prime Minister Modi-a'n eng degree emaw hna ṭha tak emaw a pe ngawt dawn lo. Tlangval nupui dila namen lo taka țawngțai hi chung lam boruak ațangin a nupui tur nula Pathianin a thlak thla tawp ngai dawn lo. Hlawhtling tur hian hlawhtlinduh ngei mihring hian tih ve tur a awm, a thlawna dawn hlawhtlinna hi khawvelah a awm lo.
TUNGE NIRISH RAJPUT CHU?
Madhya Pradesh state chhung Moa khau Bhind District lam chhuak Nirish Rajput hi chhungkaw rethei tak ațanga sei lian a ni. A pa Virendra Rajput chu mi hnuaia puan thuia inhlawh a ni a, hetiang anih avang hian an in pawh zim te a ni. A nu leh pate chuan an fapa zirna atan chuan theih tawp an chhuah a, Nirish hi Primary School ațanga Class 12 thleng chu Sorkar sikulah a kal a, college țha fee tam tak chawi ngaihnaah a lut thei chuang lo. Gwalior ațangin BSc, MSc te hi chanchinbu a sema mahni inchawm chungin a zir. Zing takah thoin chanchinbu a sem țhin.
Nirish Rajput hian High school a kal lai hian IAS awmzia leh an thawh pawh a hre lo, a hriat zawng chu UPSC Exam-a hlawhtlingte nun chu a inthlak danglam hlawk a, eng anga chhungkaw rethei leh mi hnuaichhiah pawh ni se, IAS an nih hnu chuan chutiang chu a awm tawh ngai lo a, an dinhmun a inthlak hlawk țhin tih hi mi pakhatin a hrilh a, chu thil a hriat ațang chuan hawi kir tawh loin Graduate chin exam theih, tlin theih a ni tih a hriat chuan tling tura tute sawipui emaw mi hausa nih ngai lo, zir nasat leh thawhrimna leh tum ruhna vang chauha tlin theih a nih na na na chuan tiin a inbuatsaih țan ve ta a.
Nirish Rajput hian UPSC exam hma chhawntu tam berin coaching class an kal țhin ang hi an chhungkaw sum thawh chhuahin a tlin loh avangin Coaching class kal loin an in chep tak ațang chuan a inbuatsaih ve a. A thil tum ti hlawhtling tur chuan lehkhabu tam tham tak lei a ngaih avangin a nu leh pa leh a unaute chuan theih tawp an chhuah a. A inbuatsaih lai hian a u mipa pahnihte chu zirtirtu hna (contract teacher) an thawk tawh a, an nau hi an theih ang tawkin an țanpui ṭhin.
Nirish hi class 12 a zir laiin a luhnaah pakhatna anih avang leh a hnu lam zirnaah pawh a tih țhat avangin a țhian pakhat an awmna Uttarakhand state chhunga private coaching centre hawn thara mahni inbuatsaih paha thawk turin a sawm a, inbuatsaihna lehkhabu ngai zawng zawng intum turin sàwm a ni a. Chu coaching centre sawmna chu pawmin Nirish chuan a zawm ta a. Kum hnih a thawh hnu chuan zirlai an ngah ta hle a, mahse amah ber chu a hna ațang chuan a țhianpa chuan a ban thut a. A rilru a hrehawm hle a, a tum erawh a ruh sauh thung a.
Delhi lamah nasa zawka inbuatsaih turin a kal a, coaching centre a lut tur chuan an sum neihin a tlin loh avangin a lut chuang lo. IAS nih tuma inbuatsaih ve mek țhian țhenkhat a chhar a, coaching centre a an inbuatsaihna an note lakte chu a lo la chhawng ve ṭhin. UPSC exam chu a hma chhawn ve țan ta a, thil hi awlsam taka pal tlang mai theih anih lohzia chu a exam vawi khatna leh vawi hnihnaah chuan Prelims pawh a pal tlang zo lo. Beidawng loin ngawrh zawkin in lam ațangin a inbuatsaih chhunzawm zel a, vawi 4 exam a hma chhawn meuh chuan kum 2024 khan ranking 370-na niin IAS a tling ta.
Nirish hian chiang taka a sawi chu a inbuatsaih ngawrh zual chhung chuan nitin darkar 18 lehkha a chhiar țhin (study for eighteen hours every day) a, hei hi thil tih awlsam lo tak a nih thu a sawi.
HEI VE THUNG HI
Nirish Rajput anga inbuatsaih nasa leh chhel hi Mizo zinga India ram khawpui hrang hranga UPSC coaching kal mek leh kal țhinte hi awm tak maw?
Ishita Kishore 2022 IAS topper khan, "Ka hun zawng zawng hi lehkha zirna leh chu lam ngaihtuahna atan ka hmang ber a, ka ngaihtuahna la peng theitu thil danga tel leh tih chin tawk hriat a țul hle."
Source :
====10082025
Huna Kawlvawm
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Post Instagram:
Hnahthial Insta Facebook:
Hnahthial Post YouTube:
Hnahthial Post Twitter:
