Lunglei HPC Vice Chairman Pu V. Malsawmtluanga'n Nursing School Lunglei 28th Batch Graduation leh 31st Batch Lamp Lighting Ceremony a hmanpui

Hnahthial Post | October 15, 2025, Lunglei: Lunglei High Powered Committee (HPC) Vice Chairman Pu V. Malsawmtluanga chuan nimin (14 October) khan Nursing School Lunglei (NSL)-in 28th Batch Graduation leh 31st Batch Lamp Lighting hun an buatsaih chu khuallian niin a hmanpui.

Nursing School Lunglei Auditorium-a zirlai chhuakte thlahna leh zirlai tharte lak luhnaah hian khuallian Pu V. Malsawmtluanga chuan nurse zir chhuakte leh zirlai tharte lawmpuina leh duhsakna a hlan a. Mi dangte rawngbawl tura khawnvar an chhit tawh avangin hawi kir thei an ni tawh lo tih sawiin, an eng chhit chu chhawm nung zel a, mi dang tana inchhi ral turin a chah a. NSL chu zirlai chhuanawm tak tak lo chher chhuak tawhtu a nih thu sawiin, MNC exam 2025-ah pawh result ṭha tak an nei chu chhuanawm a tih thu leh a lawmpui thu a sawi a. Nurse hna chu rawngbawlna pawimawh leh hlu tak a nih thu sawiin, nurse-te chu mi dangte damna petu leh thlamuantu, faina, ei leh in leh nunphung hrisel nei tura mi dang zirtira kawhhmuhtu, mi dang ṭanpui duhna thinlung pu a, Pathian rawngbawlna tak tak keng nungtu an ni, a ti a. Nurse hna chu khawvel khawi hmunah pawh chhawr theih leh mamawh a nih thu leh hnam dang hmuha mahni ram leh hnam chawi san theihna a nih thu sawiin, nurse zir chhuakte chu ram pawna thawh hreh lo tur leh khawi hmunah pawh rinawm taka nurse hna zahawmna chhawm nungtu nih tum turin a chah.

Pu V. Malsawmtluanga hian nurse rawngbawlna a ngaihhlutzia lantir nan, "V. Malsawmtluanga Award" tih hming chawia NSL-in kum tin an zirlai ṭha bikte chawimawina an hlan tur atan ama mimal pawisa cheng nuai 1 a hlan tur thu a puang nghal bawk.

NSL Graduation & Lamp Lighting Ceremony-ah hian NSL Choir te'n hawnna hla sain, Civil Hospital Lungleia Senior Nursing Officer Pi R. Tlangkhumi'n hunserh a hmang a. Nursing School Lunglei Principal Pi C. Rothangpuii chuan report pein, Nursing School Lunglei hi kum 1995 December ni 17-a din a nih thu leh Indian Nursing Council (INC)-in phalna a pek angin kum tin zirlai 20 lak ṭhin an nih thu te, tun thlengin zirlai 500 chuangin an zir chhuah tawh thu leh an zirlai chhuakte pawh ram chhung leh ram pawn hmun hrang hrangah hna thawka an awm thu a sawi.

NSL-a kum 1997-2000 chhunga Tutor hna leh kum 2014-2019 chhunga Principal hna lo chelh tawhtu, Principal (Retired) Pi T. Rozami chuan nurse rawngbawlna pawimawhzia leh zirlaite fuihna thu sawiin, sathau khawnvar chhit chu Florence Nightingale-i leh nurse dang tam tak anga mi dangte tana damna, thlamuanna leh beiseina eng chhi tura intiamkamna a nih thu a sawi a. Nurse zirlaite leh zir chhuakte chu damlo enkawlna kawngah an chetzia leh thil tih eng kima thinlung tak leh hmangaihna nena an tih chuan mi dangte tana beiseina eng, thlamuanna leh damna petu an ni dawn tih hrilhin, tun lai thiamna sang leh khawl changkang tak tak awm karah nurse kut ngeia khawih chu damlote thlakhlelh, mamawh leh damna petu a ni tih a sawi a. Mahni inzir belh zel tur leh an theihna leh thiamnate mi dang tan chhi eng zel tura chahin, zirlai tharte leh zir chhuakte khawnvar chhit leh thutiam sawi rualna hun a kaihruai nghal bawk.

Mizoram Nursing Council (MNC) Examination 2025-a zirlai ti ṭha, Top 10-a langte leh Letter hmute chawimawina (proficiency award) hlan niin, Khuallian Pu V. Malsawmtluanga'n zirlaite kutah chawimawina hi a hlan a. Lunglei District Senior Chief Medical Officer Dr Lalrinthangi leh Lunglei District Information & Public Relations Officer Pu C. Lalhruaitluanga te'n nurse zir chhuak (graduate)-te certificate an hlan bawk a. Zir chhuakte leh sawm bikte aṭangin thu sawi ngaihthlak niin, Tutor Pi Lalthankimi'n lawm thu sawiin hun a khar.

Proficiency Award dawngtute chu:

I. 3rd Year (Final Year):

(1) Lalsiamsaki - 2-na (Subject 2-ah Letter)

(2) Zothansangi - 3-na (Subject 3-ah Letter)

(3) S. Lalremtluangi - 6-na (Subject 1-ah Letter)

(4) FN Lalremruatpuii - 8-na (Subject 2-ah Letter)

II. 2nd Year:

(1) Lalhruaitluangi - 1-na (Subject 1-ah Letter)

(2) C. Lalremruatpuii - 2-na

(3) T. Laldintluangi - 9-na

III. 1st Year:

(1) Christine PC Lalrinsangi - 2-na