Chief Minister-in Hnahsin kut 2025 hawng

Hnahthial Post | October 14, 2025, Champhai: Vawiin tlai lam khan Chief Minister Pu Lalduhoma chuan Champhai Zotlang Mualah HNAHSIN KUT 2025 a hawng. Lt. Col. Clement Lalhmingthanga, MLA leh Pu C. Lalremliana, KVI Board Chairman ten an tawiawm.

A hawnna thu sawiin Chief Minister chuan, kan ramah hnam dangte an rawn zin a, kan ram mawizia te, boruak nawmzia te, nature hmuhnawmzia te an rawn hmu a. Khualzin hipluh theihna remchang kan ngah tih an hria a ni. Nimahsela, keimahni zawkin kan hmang thiam mai si lo va. Theihna tam tak nei, hmang chhuak thiam si lo khan kan awm reng thin.

Tunah chuan thangthar fingvar zawk in lo chhuak a, Tourism Department pawhin Tourism Sector a kalpui thiam tial tial a. Inkalpawhna kawng a lo tha ve zel bawk a. Khualzin kan hip tam ve ta tial tial mai. Nikum chhung khan Mizoram chu hmarchhaka khualzin hipluh lama hmasawn nasa ber kan ni ta a ni. Chhinchhiah chinah khualzin nuaih nga leh singhnih (5,20,000) chuangin Mizoram an rawn tlawh a, a kum hmasa aia a punna chu 139.50% a ni. Kuminah relin Sairang a rawn thleng ta a, khualzin hi an pung hle turah kan ngai.

Kan ram hi kan enkawl thiam a, kan khawtlang nun mawi tak hi kan zawrh thiam bawk chuan sum leh pai tam tak hmuh theihna leh kan hnam chawilarna remchang tak kan nei a ni. Khualzin tana tlawh nuam taka insiam thiam hi Tourism Sector-a a pawimawh lai ber a ni. Kan ram mawi tak an rawn hmuh rual hian Zo nun ze mawi, tlawmngaihnate, rinawmnate, aia upa zahna te, mikhualte chunga that chhuah thin hnam kan nihna te hi rawn hmu tel ngei se. Kan hnam kan chawimawi tihna a ni nghal zel.

Tin, khualzin rawn kal tam ber turte hi Foreigner an ni lo va, kan Indian-pui, Vai kan tihte khu an ni hlawm a. Vai rawn zin hi lo tawngpawng hlauh ngawt tur a ni lo. ILP neiin an rawn lut a, an haw a hunah an haw ve leh mai dawn a ni. Heng khualzinte hian kan ramah sum leh pai an rawn hmang a, chung chu keini tan sum lakluhna hnar an lo ni ta thin a ni. Mizoram sum hi kan thenawm state-ah a luangthla hnem tawh a. Tourism hmanga laklet dan kan dap ve a ngai a ni.

Champhai district hi zin khaw thawn nana hmun tha a ni a, a ram a nuamin a mawi a, pipu sulhnu tam tak a awm a, kan zawrh thiam phawt chuan local tourist ringawt pawh tam tham tak hipluh theih a ni. Keimahni leh keimahni kan intlawhtawn a, khawi hmunah emaw sum leh pai kan han hmang chhuakte hi tourism hmanga economy kan inchawikan tawnna a ni zel a. Chutianga mipui hip thiam apiang chuan an chhawr tangkai mai dawn a ni.

Hnahsin Kut ngaihtuah chhuak thiam kan nei te hi a vanneihthlak ka ti a. Ti hlawhtling tura Champhai mipuite tanrualna leh inpekna te hi a chhuanawm ka ti. Sorkar pawhin kan phurpui che u a, kan theih tawpin kan thawhpui che u tih in hriat kha, a ti. Mizoram mipuite chu Kut chhima Champhai tlawh turin a sawm bawk.

A hawnna inkhawmah hian Dr. Samuel Laldinthara, Chairman, Organising Committee chuan kal khawmte lawmna thu a sawi a, an tum ber chu khualzin hip a nih thu a sawi. Kumin hi a tum hnihna niin Champhai Nature Conservancy, YMA Zotlang Branch, Champhai District Photographers Society, Champhai North Joint VC, Champhai South Joint VC, Zotlang, New Champhai leh Tlangsam VC te tangkawpin Champhai mipui behchhana an buatsaih a ni.

Nikum Kut kha mi sing ruk chuangin an chhim niin an hria a, Kut denchhena Champhai leh a chhehvel mipuite sum lakluh tlingkhawm kha nuai sangkhat chuang niin an ngai.