April 2024 – March 2025 chhungin puipunna hmunah Meizu 444 man an ni

Hnahthial Post | October 14, 2025, Aizawl: Vawiin khan National Tobacco Control Programme (NTCP) National Health Mission hnuaia thawktute chuan DHME Auditorium, MINECO-ah Dr Lily Chhakchhuak, Mission Director, National Health Mission hovin an hmalakna thlirhona leh intuaitharna hun (Yearly Review Meeting & Refresher Training) an hmang.

He hun pawimawh takah hian Mizoram chhunga zuk leh hmuam dona kawnga hmalakna hrang hrang te zau takin thlirhona a ni a. Kohhran, tlawmngai pawl leh mipuiten zuk leh hmuam that lohzia kan hriat belh zel bakah zuk leh hmuam tel lo nun (Tobacco Free lifestyle) kan intihhmuh chho zel ni a lang mek te, zuk leh hmuam tih loh hi changkanna leh hriselna a ni tih hria kan pung zel ni a lang te hi a lawmawm takzet thu sawi lan a ni a.

Chutih rual chuan hmasawn ngai tak tak te pawh kan la awm ve bawk avangin tha thlah lova tan tlan zel a pawimawh zia uar takin sawi a ni. A bik takin mahni inchhung Atanga thalai naupang zawkte kan enkawl a, kan kaihhruai dan hian thui takin zuk leh hmuam leh ruihhlo tha lo laka venhimna kawngah awmzia a nei theih avangin naupang thalai zawkte enkawl dan uluk lehzual turin kan pawimawh zia sawilan a ni bawk.

Tun dinhmunah thalai naupang kum 13 atanga 15 inkar te zingah zuk leh hmuam ti hi 58% lai an nih avangin thangthar naupang zawkten zuk leh hmuam leh ruihhlo an tih lohna tura theih tawp chhuah a pawimawh zia sawiin zuk leh hmuam sim duhte tan pawh District Hospital ah leh Mizoram State Cancer Institute, Zemabawkah te puihna (Tobacco Cessation Clinic) pan theih anih thu an sawi bawk.

Kum 2024 April Atanga March 2025 chhung khan Awareness Campaign Education Institutionah vawi 291, NGO leh Kohhran hrang hrangah vawi 62 neiin Training 40 an buatsaih a. Puipunna hmun hrang hranga Meizu leh zu lo enfiahna vawi 418 an nei bawk a ni. Tin, Vaihhlo leh a kaihhnawih ti thin mi 6645 te ti tawh lo tura intiam an awm bawk a ni.

Vawiin a an hun hman hi Dr Zoramthangi Renthlei, Addl. Director (Dental) DHME leh State Nodal Officer, National Tobacco Control ni bawkin a kaihruai a, District hrang hrang atangin thawktute an kal khawm a ni.