Hnahthial District-ah Sub-National Immunization Day hawnna programme neih niin naupangte zeng hri danna pek nghal an ni

Hnahthial Post | October 14, 2025, Hnahthial: Vawiin khan Hnahthial Electric Veng Health and Wellness Centre-ah, Dr. Christina Zonunmawii, District Immunization Officer (DIO) kaihhruaiin Sub-National Immunization Day (SNID) chu Bawrhsap, Pi K. Vanlalruati'n a hawng a. Zeng hri danna (Polio Vaccine) mai bakah sawrkarin a thlawna vaccine hrang hrang a pek thin chu mipuite ngaihven turin a chah.

Bawrhsap chuan naupangten a hun taka vaccine an lak hian an len hnu a natna tam tak an vei theihna lakah a ven thu sawiin vaccine lak that pawimawhna a sawi a. Zeng hri hi India ramah chuan um bo tawh mah ila, kan chhehvel ramah zeng hri hi lo um bo a nih ve loh avangin nu leh pate chu a hun an fate takah polio vaccine hi laktir thin turin a chah a. Hri danna (vaccine) lak that hi khuareiah natna tam tak laka min vengtu a nih avangin sum khawlna tha tak pakhat a ni a, chuvang chuan mipuite chu sawrkarin a thlawna vaccine a pek chhuahte chu ngaihven theuh turin a chah a ni.

Dr. Christina Zonunmawii, DIO chuan India ram state dangah chuan October ni 12 khan SNID hi hman tan a nih tawh thu tarlangin Mizoramah chuan vawiin October ni 14 hian Hnahthial, Lunglei, Siaha, Champhai, Lawngtlai leh Khawzawlah-te hman tan a nih thu a tarlang a. India ramri hrul leh a zawmpui District ho thlan an nih thu tarlangin Burma raltlan an tam tak avang a nih thu a tarlang bawk. India ramah chuan zeng hri natna hi kum 2011 khan umbo a nih tawh thu sawiin World Health Organization (WHO) chuan kum 2014 khan India chu zeng hri awm tawh lohna hmunah a puan thu a sawi a. Amaherawhchu hemi hnu pawh hian dan pangngaiin zeng hri danna chu pek chhuah reng a nih thu leh SNID kalpui a nih chhan tak chu tunhnaiah zeng hri la umbo ve lohna ram, Burma ram atangin raltlan an rawn luh tam vang an nih thu a sawi.

DIO chuan zeng hri danna hi naupang kum nga (5) hnuailam tan pek an nih thu sawiin ka a far (oral vaccine) a nih thu a sawi. Naupang pakhat tan far hnih lek a tawk thu tarlangin naupang vaccine pekte chu an kut zungte vei lamah thai thin an nih thu a tarlang bawk.

Bawrhsapin Hnahthial District tan SNID a hawn hnu hian naupang rawn kalte chu oral vaccine hi a pe nghal a, Pi F. Lalnuntluangi, CDPO leh Pu F. Lalrinfela, DIPRO te chuan naupang rawn kalte hi vaccine an pe bawk a ni.