MSU Conference Hnahthial | "Hlawhtlinna chauh chan tum, hlawhchham ngai lo chuan a nunah harsatna emaw hlawhchhamna emaw a tawh hunah a nun a buai mai thin"

Hnahthial Post | October 10, 2025, Hnahthial: MSU General Conference vawi 23-na, Hnahthial District a neih mek chu a zan hnihna (9 October), Vantlang Inkhawm Programme, Minister of State, Prof. Lalnilawma'n khuallian niin a hmanpui a. Harsatna hi nuna bet tlat a ni tih hre reng turin zirlai kalkhawmte hnenah fuihna thuchah a sawi.

Khuallian chuan tuna National Education Policy, 2020 hman mek in a ngaih pawimawh deuh pakhat chu harsatna sutkian dan - problem solving skills a nih thu sawiin chu chu nuna zirlai pawimawh tak pakhat a ni a ti a. Hlawhtlinna chauh chan tum, hlawhchham ngai lo chuan a nunah harsatna emaw hlawhchhamna emaw a tawh hunah a nun a buai mai thin a, chuvang chuan hlawhtlinna chauh chan tum lovin harsatna tawh hi nuna thil pawimawh tak mai, mihring min chher hriamtu a ni tih hre turin zirlaite chu a chah a ni. Graduate degree nei, nu leh pa a la innghat nih ai chuan eng anga hna hniam a kan ngaih pawh thawk hreh lo, mahni intodelh nih hi a zahawm zawk a ni a ti bawk.

"Hlawhtlinna hi Hlawhchhamna atanga pen khatah a awm" tiin zirlaite chu an hlawhchham pawn beidawng lova, bei hram hram zel turin a fuih a. Mahniin nuam kan tih chin atanga kan pen chhuah loh chuan hlawhtlinna kan chan loh mai bakah kan nih theih tur ang kan ni thei dawn lo a ni tiin zirlaite chu harsatna leh hrehawmna paltlang ngam turin a fuih a ni.