MSU Conference Hnahthial | "Rilru thar nen, ram hrang hranga hna thawk thei tura kan inpharh zau tan a ngai a ni"

Hnahthial Post | October 10, 2025, Hnahthial: MSU General Conference vawi 23-na chu chhunzawm zel niin nimin (9 October) chawhnu Vantlang Inkhawm Progamme, Lalnu Ropuiliani Run a hman chu Adviser to CM, Pu Lalmuanpuia Punte chuan Khuallian niin a hmanpui a; zirlaite chu rilru thar nen, ram hrang hranga hna thawk thei tura kan inpharh zau tan a ngai a ni a ti. Uaptu ah MLA, Pu Jeje Lalpekhlua chu tangin zirlaite chu mahni chawr chhuahna zahpui ngai lo turin a chah a ni.

Pu Lalmuanpuia Punte chuan Hnahthial District-in Bialtu MLA chak tak an nei tih sawiin Lunglei to Champhai pawh theihna tur, Hrangturzo kawng pawh black top tura ruahmanna an siam dun mek thu a sawi a. Lunglei to Champhai sumo service tan Hnahthial chu kawng pawimawh tak a la nih dawn thu a sawi bawk.

Adviser to CM chuan Mizote chu tum mumal nei lova General line a kal vak vak lo tura chahin Professional line kal uar a tul thu a sawi a. Chu mai bakah thiamna tak tak chher chhuah nan skill development uar a tul thu a sawi bawk. Chumi tur atan chuan tunah Skill Development Incubation Centre din tura ruahmanna siam mek a nih thu leh Mizote chu ram dangte tan pawh hna zawnga an rawn kal zawkna an ni thei a a hriat thu a sawi. Chu dinhmun thleng tur chuan zirlaite chuan Mizoram chauh thlir lovin ram dangah pawh hna zawnga, chumi hmunah chuan Mizoram tan thiamna chher chhuak a, feh chhuak ngam thin turin a chah nghal a ni.

Uaptu, Pu Jeje Lalpekhlua chuan fuihna thuchah sawiin hnathawh hreh neih loh leh tlawmngaihna vawn nun a tul thu a sawi a. Inzahtawn thiam zir nawn leh a tul thu sawiin hmaichhan chauh lovah pawh, social media-ah te pawh tawngkam uluk a, mi chhiatna lai sawi uar lova, mahni thatna lai inchawikansak tawn thiam turin a chah nghal a. Mahni nihna baka lan tum hi thil tha lo tak tak min tih tir thintu a ni a, chuvang chuan mahni chawr chhuahna hmun leh mahni nihna zahpui lovin, hmasawnna rilru nen mahni neih tawkah lungawi thiam turin a chah a ni.