Hnahthial Post | October 9, 2025, Thingsai: Nimin nilaini (8 October) khan Environment, Forest & Climate Change Department Thingsai Range a thawktu te leh YMA Thingsai North Branch tangdun chuan Joint protection duty an nei.
Joint protection duty a h hian Thingsai ram chhunga community reserved forest 'Chaltlang' ngaw an fang a, thang kam engemaw zat an ti chhia a ni.
Chaltlang ram hi hun rei tak atangin humhalh a lo ni tawh a, YMA chuan a chhunga cheng nungcha leh thing leh mau awm te pawh chhinchhiahin khaw chhung mite pawhin ram ngaw chhunga ramvah leh huan siam te an khap a.Tun thleng hian EF&CC department nen tha taka humhalh kal zel a la ni a, tu leh fate tana rotling ni turin hma an la mek a ni.
Chaltlang ram humhalh chin zau zawng hi 138.71acre a niin ramri chhinchhiahna te,a hungna te, welcome gate leh waiting shed bakah watch tower te department atang hian siam a lo ni tawh bawk.
Chaltlang reserved forest mai bakah hian department chuan tunlai hian an Range chhunga nungcha humhalhna nasa takin an kalpui a, khawtlang hruaitute nen hmun hrang hrangah duty in an chhuak thin.Thing leh mau nungcha te a ti chereu zawnga awm lo turin mipuite an chah a, nungcha leh ramngaw tichereu zawnga awmte lakah dan angin na taka action lak zel a ni dawn thu an department leh YMA tangkawp chuan an sawi.
Tags
News