MZP-in Sairang rel Station leh a chhehvel enfiah; Sairang rel Station hawn a nih atanga ni 7 October, 2025 thleng ILP 3,852 pek chhuah a ni tawh

Hnahthial Post | October 9, 2025, Aizawl: Mizo Zirlai Pawl General Headquarters chuan October ni 8, 2025 (Nilaini) zing dar 8:00 khan, Sairang Rel Station tlawhin, he hunah hian Inner Line Permit (ILP) pek chhuah dan zirchianna leh Station hmunhma te enfiahna hun an hmang.

MZP chuan Sairang thlenga Rel rawn lut tur chungchangah hian Seminar leh Talk Show te an lo buatsaih tawh a, MZP rorelna sang Federal Council vawi 57-na April ni 11, 2024 (Ningani) a thukhawm chuan “Sairang thlenga rel alo luh dawn avangin, Sawrkarin Inner Line Permit (ILP) check dan turah ruahmanna fel fai zawk a siam theih nan, MZP in hma la rawh se” ti a lo rel tawh bawhzuiin, April ni 29, 2024 khan Chief Minister, Pu Lalduhoma hnenah Inner Line Permit(ILP) chungchang rawtna an lo thlen a ni tawh bawk.

Sairang thlenga Rel rawn lut hi MZP chuan, ngun taka zirchianna a neih hnuin hnawh sarum takin India sorkar hian he station hi a hawng ringawt mai a, station a nihna tur ang la ni lo tih hre reng chungin Prime Minister chu hawn tir a ni a, hei bakah hian Mizoram sawrkar la inpeih loh zia pawh chiang takin kan hmu a ni, tiin. Heng te avang hian Mizo mipui ten harsatna kan tawk tan mek a ni, an ti bawk.

Rel Station hawn a nih tuk September ni 14, 2025 (Sunday) atanga October ni 7, 2025 (Thawhlehni) thlengin ILP hi 3,852 pekchhuah tawh a ni a, kutdawh thawn kir hi 6 an awm tawh bawk. Ni khat chhunga ILP pek chhuah tam ber tum hian mi 360 niin pek chhuah tlem ber tum hian mi 46 hnenah pek an ni a, Guwahati atanga Rel ticket Sairang thlenga a full reng laia, ILP pekchhuah tlem lutuk hi MZP chuan mak a ti hle a, hei hian ILP nei lo a bi bo tam tak an awm tih chiang takin a lan tir. MZP ten he station an tlawh lai pawhin ILP nei lo a, a ruka chhuah tum mi 30 vel lai an man chhuak nghe nghe a ni.

Hei bakah hian Bairabi leh Sairang inkar a station Hortoki, Kawnpui leh Mualkhang lamah pawh rel a tlan muang deuh ni a sawi awmin, tam tak an chhuk ni a hriat a ni. MZP-in a zirchianna a neih lai mek hian, heng hmunah te hian police duty awm ve mahse tam tak chu ILP nei loin an chhuak ngei ang tih MZP chuan a ring tlat a ni.

Mizoram-a hnamdang lo lut te hi Tourist ang veka ILP pek an ni a, an lut lam chhinchhiah ni mahse an haw lam chiang taka chhinchhiah a ni lo a, hei hian Mizoram-ah awlsam taka luhna atan mi tam takin an hmang dawn tih a chiang a, cham hlen ta pawh tam tak an awm dawn tih a chiang hle a ni, tih an thuchhuah hian an tarlang bawk.

MZP in Sairang Rel station a zirchianna dinhmun tlangpui:-

1. ILP check leh pe chhuaktu Mizoram Police duty an indaih lo hle.

2. ILP pekchhuah hi manual a tih vek a nih avangin, a la fel fai tawk lo hle.

3. CCTV engmah vuah ala awmlo.

4. Gate mumal tak siam ala nilo.

5. Fencing a tha tawk lo.

6. X-Ray Baggage Scanner khawl pawh hman theih a la nilo.

7. Mizoram hi dry state anih angin, Excise & Narcotics duty dah an nilo bawk.

8. Parking area a fel fai lo.

9. Station a duty zawng zawngte training pek nise.

MZP chuan, Mizo hnam chimralna laka kan him tlan zawk theihna tur ngaihtuahin hma a la zel dawn a, hnamdang rawn lutte khuahkhirhna dan khauh tak kan neih sa hi a nihna ang taka rel Station a kenkawh zel hi MZP duh dan a ni.