Tourism Minister hovin Tourism Stakeholder Consultative Meeting neih a ni

Hnahthial Post | October 22, 2025, Mamit: Vawiin chawhmu khan Tourism Minister Pu Lalnghinglova Hmar hovin I&PR Lianchhiari Rûn Conference Hall-ah Tourism Stakeholder Consultative Meeting neih a ni a. Sairang thleng rel lu lo lut avanga khualzin lo punchho zel turah tourism kaihhnawih a eizawng leh inhnamhnawih - sorkar department, ACBOA, tour operator, hotel, restaurant, homestay, Sairang khawtlang aiawh bakah mediaperson te an tel a ni.

Tourism Minister chuan thu sawiin, economy hmasawnna kawnga tourism in a thawh hlawk theih dan a tarlang a. India state dang, Mizoram thenawm hnai lawkah te pawh an state sum thawhchhuah GSDP ah tourism thawh hlawk theih zia tarlangin, tuna Sairang thleng rel lo lut avanga Mizoram pan man a tlawm tak leh a awlsam tak avanga khualzin tam zel tur hre reng chunga kan inpuahchah that a pawimawh thu a sawi a. Kan thil neih sa, kan hmun neih sa te hi keimahni hian tlawh in, hlut nachang leh ngaihven nachang kan hriat hmasak phawt chuan state pawn ram pawn lam khualzin te chuan an rawn ngaihsak zui ve mai tur thu a sawi a. Tun hnai lawkah Champhai a Hnahsin Kut buatsaih te chu "community based festival" fakawm tak a nih thu a sawi a. Adventure tourism te, Eco tourism te mai bakah tunah Agro based tourism uar chho zel turin Tourism Department chuan hma a lak thu leh, nakum atangin chuan khualzin ten mumal taka an lo kal hun tur an ruahman theih nan leh tourism sector a thawkte tan pawh a remchanna tur zawkin Tourism Calendar siam tum a nih thu Pu Lalnghinglova Hmar chuan a sawi bawk a ni.

Tourism Minister chuan tourism in ken tel tha tak tak a neih rualin a tha lo pawh a awm tel thin ve tho avangin inrawnkhawmna chu tangkai taka hmang a, tawnhriat te inhrilh tawn a, tourism sector a tel hrang hrang te inzir a hmasawn tlan nan hmang ngei turin kalkhawmte a chah a ni.

Vawiin consultative meeting ah hian Pi Lalrodingi, Tourism Director leh Er. R. Lalrammawia, Director , Transport Department te hnen atangin thusawi ngaihthlak a ni bawk a. Kalkhawmte hnen atangin tunhnai a mikhual an lo dawnsawn dan a harsatna leh danglamna awm te, hmasawnna leh hmalakna belh ngaihna nia an hriat te sawihona neih chhunzawm a ni.