Working Women Hostel SASCI 2024-2025 atangin pasarih sak a ni dawn

Hnahthial Post | October 18, 2025, Aizawl: Nimin (17 October) khan Chief Minister Pu Lalduhoma chuan I & PR Auditorium-ah Khatla Venga Working Women Hostel sakna tur lungphum a phum a. Khatla bialtu MLA Pu VL Zaithanzama'n Chief Minister hi a tawiawm. Khatla Hostel hi kumina Working Women Hostel sak thar tur pasarih zinga pakhat a ni.

Thusawiin Chief Minister chuan, SASCI 2024-25 Part X- ah Central sorkar chuan Working Women Hostel sakna tur a ruahman a, Mizoramin Rs. 127 Crore kan hmu a. Hostel pasarih sak kan pawm ta a ni. Vawiina a lung kan phum Khatla Working Women Hostel hi Mizo Hmeichhe Tangrualten kum tam tak Women Hostel an lo kalpui tawhna hmun a ni a. An building a upain a thar an mamawh tih kan hria a. Mi tam zawk lenna neih a tul bawk si a. A thar saksak kan rel ta a ni, a ti.

Hmasawnna hna kan thawhte hi a hun taka zawh zel theih kan duh a, hna thawh tha kan duh a, revise ngai lo va kal zel kan duh bawk a. Chutianga kan kal theih nan chuan sorkar hmalakna viltu tur State Monitoring Committee kan din a ni. Anni hian kan Women Hostel sak mekte pawh hi a tul angin an rawn endik thin ang.

15th Finance Commission hun tawp lamah kan awm avangin kan fund hmuhte hi hmanhmawh taka kalpui a tul a, chuvang chuan SASCI hna thenkhat hi chu restricted tender kalpui kan phalsak a ni, a ti bawk.

Chief Minister hian, kum tam tak Working Women Hostel an lo kalpui tawhnaah Hmeichhe Tangrual Pawlte hnenah lawmthu a hrilh a. Building thar chuan zau zawka rawngbawlna a hawnsak tur thu hrilhin, ram tana tangkai taka hmang turin a chah a ni.

Mizo Hmeichhe Tangrualte enkawl Khatla Women Hostel hi kum 1975 a Social Welfare Board, Government of India atanga pawisa hmuh hmanga sak a ni a. A tirah mi 30 awm theihna niin a hnuah central sorkar vekin sum a rawn pek belh hmangin an tilian leh a, mi 60 khawsak theihna a lo ni ta a, a thar sak a nih dawn tak avangin building hlui hi thiah a ni ta a. A satu tur hi Sky Builders, Zemabawk North an ni.

Inkhawm hi Pi Lalzarmawii, IAS, Commissioner & Secretary, WCD chuan a kaihruai a, kal khawmte lawmna thu a sawi a. Pi Zoramthangi Chhangte, Director, Women & Child Development (WCD) chuan Working Women Hostel sak hna kalpui dan tlangpui report a pe. Working Women Hostel hi Mizoramin pariat a nei mek a, a thar pasarihte hi peih an nih chuan 15 a awm tawh dawn a ni. Pu Hrangthanga Zote, CE, PWD, Buildings chuan technical report a pe a. Khatla Hostel hi chhawng sarih a sang leh floor tina insukna hmun awm tura duan, room zawng zawngin toilet nei vek tura duan niin, mi 140 an khawsa thei dawn a ni.

Mizoram sorkarin SASCI 2024-25 Part X atanga Working Women Hostel a sak turte chu:

1. Vawiina a lungphum phum tak, Khatla Hostel, mi 140 awm theihna Rs. 29. 72 crore senna tur.

2. Ramhlun Sports Complex Hostel, mi 50 awm theihna tur, Rs. 14.01 crore senna tur.

3. ITI Veng Hostel, mi 50 awm theihna Rs. 18.18 crore senna tur.

4. Mi 120 awm theihna tur ZMC Working Women Hostel, Rs. 26.34 crore senna tur.

5. Mi 50 awm theihna tur Lunglei Ramthar Veng Hostel, Rs. 14.09 crore senga sak tur.

6. Mi 50 awm theihna tur Champhai Hostel, Rs. 13.66 crore senga sak tur, leh

7. Mi 30 awm theihna tur Thenzawl Working Women Hostel, Rs. 11 crore senga sak turte an ni.

Champhai tih loh hmun dangah hian hnathawh bul tan vek tawh an ni.