PMMSY hnuaia Recreational Fisheries chawisanna tur sum, Tuipui South Branch YMA hnenah MLA Pu Jeje Lalpekhlua'n a hlan

Hnahthial Post | October 18, 2025, Hnahthial: Nimin (17 October) khan Tuipui South Branch YMA Hall-ah, Sawrkar Laipui Scheme - Pradhan Mantri Matsya Sampada Yojana (PMMSY) hnuaia Fisheries kaihhnawih hmanga intihhlimna chawisan nana sum dah chu South Tuipui Bialtu MLA, Pu Jeje Lalpekhlua chuan Tuipui South Branch YMA-te hnenah a hlan a; Tuipui South-ah hmalakna an nghah thu leh Mizoram pum huap turin a vawi khat nan Fish Festival an huaihawt tur chu lawmawm a tih thu a sawi. Sum hlanna inkhawm hi District Fisheries Development Officer (DFDO), Pu George Lalnuntluanga chuan kaihruaiin scheme awmzia hrilhfiahna hun atan a hmang nghal a ni.

Pu Jeje Lalpekhlua chuan MLA a nih hnuah Tuipui South chu a ngaih pawimawh hmasak berte zing ami an nih thu leh MLA Fund hmanga hma a lak hmasakna ber zing ami an nih thu a sawi a. Tuipui South chu Mizoram pum huap pawh a sangha humhalh tha berte zing ami an nih thu sawiin khawtlang hruaitute leh Fisheries department-te thawhonna zar a nih thu a sawi. Tuna sum an inhlan hi duan a nih chhan ang ngei, Fisheries kaihhnawih hmanga intihhlimna hmasawnna atan an khua chuan lo hmang tura chahin sawrkar hmalakna chu sawisel mai lova, khawtlang tana tha tur a nih chuan tawiawm thiam zel turin a chah nghal a ni.

Fish Festival, tun kum tawp, December-a huaihawt tur chu thil lawmawm tak, Mizo mipuite pawhin an nghahhleh em em a nih thu sawiin a hlawhtlin nan theihtawp chhuah turin khawtlang mupuite chu a chah a. He Festival-ah hian mipuiten harsa lova an khua an pan theih nan Border Roads Task Force (BRTF) te kawng thuam tha tura a biak nghal thu a sawi bawk.

Tourism chawisan nan, Pradhan Mantri Janjatiya Unnat Gram Abhiyan (PMJUGA) hnuaiah Homestay siamna tur fund an dah thu tarlangin ama bial 29- South Tuipui Constituency-ah mi sawmhnih paruk (26) thlan an nih thu leh chung zinga mi panga (5) chu Tuipui South ami an nih thu a tarlang a. Hei bakah hian an khuaa Jio tower, a khawl that loh vanga function tha thei lo chu siamtha turin hma a lak mek thu a tarlang a ni.

DFDO, Pu George Lalnuntluanga chuan MLA-in YMA hnena a hlan tak hi Financial Year 2023-24 chhunga PMMSY hnuaia "Promotional Fisheries Activities" atana hman tura dah kha a nih thu a tarlang a. He scheme hi Luidung leh a chhehvela intihhlimna chi hrang hrang chawisanna tur - Homestay, Tourist Lodge leh lawng chung nei kan tih ang atan te siam nana hman tur a nih thu a sawi a. State Matching Share (SMS) anga kalpui a nih thu leh 54:6:40 angin Central, State leh Beneficiaries te inkarah pawisa thawh tur hi insem a nih thu a tarlang bawk.

Recreational Fisheries promote nan Tupui South YMA-te tan cheng nuai 50 (Rs 50 lakhs) dah niin chung zingah 60%, cheng nuai 30 (Rs 30 lakhs) chu Central leh State sawrkarin an a tum ang a, a bak cheng nuai 20 (Rs 20 lakhs) chu a dawngtu (beneficiaries) ten an tum a tul ve thung dawn a ni. Tanpuina sum, cheng nuai 30 (Rs 30 lakhs) hi installment anga pek chhuah tur niin tunah hian first installment-in cheng nuai sawm leh panga (Rs 15 lakhs) pek chhuah phawt an ni.

Tupui 'South' Village Council hian Tuipui 'D' Village Council hming pu thinin Rural Development & Administration Department-in September ni 8, 2025 -a Notification No. D. 11030/19/2025-RD&AD(LAD) a tih chhuah angin an khaw hming hi a thlak a ni.