Transport Department Minister Pu Vanlalhlana'n Hnahthial District Transport Office hawng

Hnahthial Post | October 18, 2025, Hnahthial: Nimin (17 October) khan Lungleng Veng, Lalnu Ropuiliani Hall bulah Transport Department Minister, Pu Vanlalhlana'n District Transport Office (DTO) chu a hawng a. Minister chuan tui lama inkalpawhna tur- Inland Waterways Transport-ah hma an lak tan mek thu a tarlang. Hawnna Programme-ah hian Bialtu MLA, Pu Jeje Lalpekhlua chuan Minister hi tawiawmin Hnahthial mipuiten an nghahhleh em em, District Transport Office an nei ta chu lawmawm a tih takzet thu a sawi.

Minister chuan DTO an hawng thei ta chu lawmawm a tih thu sawiin DTO rualin Hnahthial District DTO Code - MZ-11 chu Hnahthial mipuite tan a tlangzarh nghal a. Recruitment, digitization leh thil hrang hrang buaipui ngai avangin duh angin an rawn hawng hma thei lo chu mipuite hriatthiamna a ngen a. DTO office hawn tak hi mipuite, a bikin lirthei khalh turte harsatna tam tak sukiangtu a nih a besei thu a sawi bawk. Mipuite tana thil lawmawm tak a nih rualin dan zawm lo te tan thil huphurhawm tak tur a nih tur thu a sawi a. Chuvangin lirthei neitute chuan buaina an tawh loh nan license leh lehkha pawimawh dang chu dan in a phut angin, felfai tak nei thin turin a chah a ni.

Minister chu Inland Waterways Transport nei turin tui khuah sa na hmun pahnih - Serlui B leh Tuirial te chu an thilthlai mek thu a tarlang a. Tunah hian Central lamin an rawn enfiah tawh thu leh hmalak zui dan tur ngaihtuah mek a nih thu a tarlang.

MLA, Pu Jeje Lalpekhlua chuan DTO chu Hnahthial mipuiten an lo nghahhleh em em a nih thu a sawi a. Thil lawmawm tak a nih rual khauh zawkin lirthei chungchangah dan zawm a tul tawh tur thu sawiin mipuite chu khua leh tui tha ni a, dan tha taka zawm thin turin a chah a ni.

He hunah hian Transport Department Director, Er. R. Lalrammawia chuan thu sawiin kum khat chhung chu motor registration DTO Code MZ-02 atanga MZ-11 a thlak duh te tan hun an hawn tur thu a tarlang a. Thlak duh tan Lunglei DTO atangin No Objection Certificate (NOC) lak mai tur a nih thu a tarlang bawk.

Bawrhsap, Pi K. Vanlalruati chuan thusawina hun hmang bawkin tun hnaiah Hnahthial District tan office hrang hrang hawn thar a ni chu lawmawm a tih thu sawiin Fire and Emergency Services pawh neih thuai an in beisei thu a sawi bawk.

DTO hawnna programme hi Transport Department Secretary, Pu Zosangliana chuan kaihruaiin Head of Office-te, Khawtlang hruaitute leh NGO hrang hrang hruaitute an tel a. Pu Lalrinawma, Tansport Department Jt. Director (MV) chuan lawmthu sawiin hun a khar a ni.

Hnahthial DTO hi Lungleng Veng, Lalnu Ropuiliani Hall bulah awmin SDO (Civil) office building hlui thuam thain an luah lut a, Staff pakua (9) awm tura ruahmanna siam a ni.