World Mental Health Day 2025 hman a ni

Hnahthial Post | October 10, 2025, Aizawl: Vawiin khan Khawvel puma Rilru Hriselna chungchang Inzirtirna Ni (World Mental Health Day, 2025) chu, ‘Access to service Mental Health in catastrophies and Emergencies’ tih thupuia neiin, Directorate of Hospital & Medical Education Auditorium-ah hman a ni.

World Mental Health Day puala hun hmanah hian Dr. Zonunmawii Pachuau, Addl. Director, DHME chuan thupui sawizauna neiin, Mizoramah rilru lam hrisel lohna chu a hluar chho nasa em em a, zirlaite zinga depression rate sang leh ruihhlo hman khawlohna hluarte bakah social media hman nasat avanga rilru hnualte chu a lan chhuah dan langsar tak an ni a ti a. Heng thilte hmachhawn dan tur kawngah hian Sawrkar pawhin policy mumal tak a mamawh tak thute tarlangin, tun dinhmunah chuan, rilru hriselna lama harsatna nei ten engtik hunah pawh an harsatnate an thlen theihna tur National Mental Health Programme hnuaia hmalakna pakhat TELE-MANAS-te, National Mental Health Programme hnuaiah vek tlawmngai pawl thlan chhuah bikte nena thawhhona kalpui a nih dan te a sawifiah a. Rilru Hriselna lama harsatna chu la pawimawh zual zel tur thil a nih thu a sawi bawk a ni.

World Mental Health Day hi kum 1992 khan World Federation for Mental Health (WFMH) chuan a hmang tan a. A tirah chuan thupui bik pawh nei lovin rilru hriselna lam zirtirna leh puan chuahna atan hman thin a ni a. Kum 1994 atang khan rilru lama harsatna leh damlohna hrang hrang tarlanna atan thupui bik siam/neih thin a ni a. A hnuah World Health Organization (WHO) leh thawhpui dang ten zawmin, ririru lama damlohna te inzirtirna leh hmalakna atan khawvel puma hman thin tura ruahman a ni ta a ni.

World Mental Health Day thil tum pawimawh tak takte zingah rilru lama Hrisel lohna hrang hrang endawngna leh thin hrikna tih bo te, rilru natna chungchanga mipui hriatna dik leh tha zawk siamte, leh rilru hrisel nei thei tura enkawlna leh puihna hrang hrangte mipui hrilhhriatte chu a langsar zual a ni.

National Mental Health Programme (NMHP) chuan zau zawka hna an thawh theihna turin Digital Wing Tele-MANAS -Phone hmanga rilru lama harsatna neite tanpuina- programme an kalpui a. Tele MANAS kaltlang hian engtik hunah pawh phone hmangin rilru hriselna lamah counseling mamawhte chu puih thin an ni a. Tele MANAS hi toll free number 14416 emaw 18008914416-ah engtik lai pawhin a biak theih reng a ni. NMHP hnuaiah vek hian Targeted Intervention (NGOs) awmin, ARDSI-Mizoram Chapter-te nen thawk hoin, awareness, outreach leh home visits-te kalpui thin a ni a. Heng tanpuitu pawlte hi englai pawhin a mamawh apiang tan telephone no. 7005983633/9366191341 hmanga biak theih reng an ni bawk.

Vawiina World Mental Health Day 2025 puala hun hman hi Dr. Robert L. Khawlhring chuan kaihruaiin, hun hi then hnih angin, thupui thlan bik neia hman a ni a. Health Department hotute bakah, DIPR aiawhin, Pi Mina Zoliani, Jt. Director, DIPR-te, Pu Vanneihtluanga, President, ARDSI leh Pu C. Lalrambuatsaiha, MJA President-te hnen atangin thusawi ngaihthlak a ni a. Hemi zawh hian zawhna leh chhanna hun hlimawm leh hlawkthlak tak hmanho nghal a ni bawk.