Mizoram Chief Secretary Pu Khilli Ram Meena-in Central Jail tlawh

Hnahthial Post | October 10, 2025, Aizawl: Tukin 9:00Am khan Mizoram Chief Secretary Pu Khilli Ram Meena chuan Central Jail a tlawh a. Central Jail chhunga ICTC (Integrated Counseling and Test Centre), Library, Computer Centre, Legal Aid Centre leh Convict Ward te a fang. Prisoners Welfare Committee (PWC) hruaitute kawmin, nitin an hun hman dan te, an hriselna chungchang leh an ei leh in chungchang te, harsatna an neih leh neih loh te a zawt. ICTC viltu Dr. CT.Lalruatkima leh staff te kawmin, Jail tangte hriselna dinhmun leh an enkawl dan te a zawt bawk.

Central Jail a tlawh zawh hnuah hian Chief Secretary chuan hmeichhe Jail (Central Women’s Jail ), Central Jail bula mi chu tlawh lehin, Ward hrang hrang a fang leh bawk.

Central Jail hi kum 15.9.1986 a commission tawh kha a ni a, a building te a hluiin, a chhe tawh hle a. Tunah hian SASCI Part I hnuai atangin cheng vaibelchhe ₹13.925 senga sak that turin ruahmanna chak taka kalpui mek a ni a. Chief Secretary Pu Khilli Ram Meena chuan working season chhunga a tam thei ang bera hna thawk hman tura inpuahchahna felfai tak neih a tul thu concern official te a hrilh bawk.

Vawiin Chief Secretary in Central Jail a tlawhna-ah hian Pu Sharad Agrawal DGP, Pu Vanlalmawia Renthlei, Secretary, Home; Pu TL.Guite Secretary, Law & Judicial Dept.; Pu Hrangthanga Zote, CE,PWD( Building), Pi Lalchhandami, Chief Architect, PWD(Building), Er.Lalhriatpuia, Aizawl DC, Pu R.Vanlalsawta, IG Prison, Pu Andrew H.Vanlaldika, Addl. Secretary, Home leh te bakah officials dang ten an tawiawm a ni.

Tunah hian Central Jail-ah hian tang (Prisoners). Lifer-54, Under Trial Prisoner (UTP)-500, RI(Rigorous Imprisonment) Convict-280 leh SI(Simple Imprisonment) Convict-94, an vaiin 928 an awm mek a.

Central Women’s Jail-ah hian tang (prisoners) Lifer-Nil, Under Trial Prisoner (UTP)-107,RI Convict-31, SI Convict-5 leh Naupang-9, an vaiin 152 an awm mek bawk.