Agriculture Minister leh Sports Minister ten Chhuanthar Futsal Ground phullem phah thar hawnna hun an hmanpui

Hnahthial Post | November 4, 2025, Aizawl: Vawiin khan Agriculture Minister Pu PC Vanlalruata leh Sports Minister Pu Lalnghingloa Hmar te chuan Chhuanthar Futsal phullem phah thar leh Vangpui Tualvawt Chhuanthar Futsal Hunpui hawnna programme an hmanpui.

Agriculture Minister Pu PC Vanlalruata, bialtu MLA ni bawk chuan Futsal Ground grass phah thar hawn a ni chu lawmawm a tih thu a sawi a. Tluang tak leh hlim takin tournament neih a nih theih nan duhsakna hlanin, Football ground puitling sual chhuah ngei an tum dawn tih a sawi bawk. Pu PC Vanlalruata chuan Chhuanthar mipuite taimakzia leh mahni inthunna (discipline) an neih thatzia sawiin “Kan taimakna leh invawnna hi Mizoram mipuiten an entawn mek a ni” a ti a. Faina leh thianghlimna kawngah te, ruihtheihthil laka inthiarfihlim kawngah te, midangte tana entawntlak nih tum zel turin a chah a ni.

Sports Minister Pu Lalnghingloa Hmar pawhin thu sawiin Chhuanthar Fustal Ground phullem phah a ni ta chu a lawmpui a. He phullem phah a nih theih nana hma an lak dan sawiin, bialtu MLA Pu PC Vanlalruata’n a hnenah Chhuanthara phullem phah chungchangah, “Ka intiam tawha, ka tihhlawhtlin a ngai a ni” a ti a; kuminah a hlawhtlinna kan hmu ta mai hi bialtu MLA thahnemngaihna nasatzia a lang a ni, a ti. Football khelmual puitling siam chungchang pawh bialtu MLA nen an sawi dun tawh thu Sports Minister chuan a sawi a. Bialtu MLA nen tangkawpin tun term chhung ngeia khelmual puitling siam hman an inbeisei thu a sawi bawk.

Chhuanthar Futsal Ground sakna tur atana kutthlak tan ni hi October 11, 2022 a ni a. Hnatlang tha leh mipui sum thawhkhawm bakah sawrkar tanpuina te dawngin kum 2023 October thlaah tournament hmasa ber khelh a ni a. Kum 2024 Khuangchawi Thla Vangpui Chhuanthar Futsal Hunpuia Khuallian Pu PC Vanlalruata’n phullem phah a nih theihna atana hmalakna lo tiam tawh angin kumin Vangpui Kutah hian Sports Minister Pu Lalnghingloa Hmar chuan Futsal Ground Artificial Grass phah thar hi a hawng ta a ni.

Vawiin programme ah hian Chhuanthar Sporting Club President bakah VC te leh tlawmngai pawl hruaituten thu an sawi a. Report ngaihthlak niin Chhuanthar Futsal Ground sak a ni dan documentary film thlirho a ni bawk.