Mizo Territorial Army (MTA) Recruitment Rally neih tur inbuatsaihna thlir ho

Hnahthial Post | November 4, 2025, Aizawl: Vawiin khan kan hma lawk ni 15th- 25th Nov, 2025 chhunga Rajiv Gandhi Stadium, Mualpuia Mizo Territorial Army (MTA) lak runpui (Recruitment Rally) neih tur chungchangah, mawhphurhna nei department hrang hrang te inpuahchah dan leh hmalak chin thlirhona meeting, Rajiv Gandhi Stadium VIP’s Lounge-ah neih a ni a. Meeting hi Lt.Col.(Retd) Clement Lalhmingthanga, MLA leh State Level Committee on Territorial Army Coordination and Establishment Chairman ni bawk chuan a kaihruai a ni.

MTA recruitment Rally Mizoram sawrkar leh 166 INF BN (TA) ( H&H), Assam te tangkawpa buatsaih tur a ni a, tha tak leh tluang taka neih a nih theih nan hian Mizoram Sawrkar hnuaia department hrang hrang te bakah NGO leh Local Council thenkhat te hnenah mawhphurhna chanvo hrang hrang pek an ni a. Vawiin meeting-ah hian chung an mawhphurhna hlen chhuak tura an hmalak tawh chin leh an hmachhawp te thlir ho a nih bakah Inter- Department Coordination tha pawimawh zia te sawiho a ni bawk.

Vawiin meeting-ah hian Pu Clement Lalhmingthanga chuan kan ram leh kan thalai te tana MTA Recruitment Rally hlutzia hria a, kan awmna khua leh venga Kan thalai te hnenah recruitment rally a tel turin i fuih theuh ang u. General Duty personnel-ah 144 lai lak a ni dawn bakah hmeichhe tan seat 9 reserved sak a ni bawk dawn a. A dil thei chin pawh kum 18-42 inkar lai a nih avangin a huam zau hle a ni. An hlawh te a that em em mai bakah mahni state-a awm reng siin, hard posting ( hardship) allowance ₹9000 vel lai an la dawng bawk dawn a, 8th pay te an hman hunah phei chuan hlawh sang tak an la dawn. Hetianga Mizoram leh kan thalai te tan malsawmna kawng inhawng tur, Recruitment Rally-a mawhphurhna chanvo kan neih te hi ngai pawimawh ila, a tha thei ang berin hlenchhuah I tum theuh ang u, tiin member-te a sawmin a ngen a ni.