IPRP&S Minister B Lalchhanzova'n MADS Annual Art Exhibition a hawng

Hnahthial Post | November 4, 2025, Aizawl: Directorate of Information & Public Relations leh Mizoram Art Development Society tangkawpin a buatsaih Annual Art Exhibition 2025 chu vawiin khan IPRP&S Minister Pu B. Lalchhanzova chuan a hawng. I&PR Director Pi K. Vanlalsangi chu he hunah hian Special Guest a ni a. Exhibition hi Lianchhiari Run Art Gallery, I&PR Directorate ah vawiin November ni 4 atanga ni 14, 2025 thleng neih a ni ang. Artist 56 telin lemziak leh lem tuk a vaiin 100 pholan a ni.

Exhibition hawnna inkhawm Lianchhiari Run Mini Theatre-a neih ah Minister chuan thu sawiin, Art chu thil ril leh ropui tak, mi zawng zawngin an tih ve vek theihloh a nih thu sawiin, exhibition ah Artwork tha tak tak mi sawmruk dawn lai maiin an phochhuak thei chu lawmawm a ti a. Zau zawka Mizo artist te kutchhuak chawilar zel a duh thu sawi bawkin, sorkar pawhin a remchan dan angin ruahmanna a siam belh zel a thu a sawi. Hemi kawngah hain I&PR chuan Annual Exhibition a buatsaih pui thin thu leh hmalakna dang hrang hrang tihho a nih thin thu a sawi.

Minister Pu B. Lalchhanzova chuan NGO te, Civil society te hi an din chhan ber, an thiltum an 'mission' ah an chian tlat a pawimawh thu sawiin, hemi kawngah hian MADS te chu hma la tha hle nia a hriat thu a sawi bawk.

Vawiin programme ah hian MADS leh I&PR tangkawpa Painting intihsiakna lo buatsaih tawha category hrang hrnga lawmman latute hnenah Chief Guest leh Special Guest ten lawmman an hlan a. Lawmman latute chu hengte hi an ni:

Professional Category:

1) Lalrinluana, Tuikhuahtlang

2) Zomuanpuia, Lawipu Veng

3) HD Lalthanzuala, Bawngkawn

High School Category:

1) Srishti Dep Roy, St. Paul's High School

2) Josephine Vanmalsawmi Ralte, Govt. Mizo High School

3) Angela Larinmawii, Divine Intervention School

Middle School Category:

1) Lalnunmawii Jongte, Ar Ells School

2) Sebastian Lalpekmawia, Siamliana Memorial School

3) Ruth Lalhruaizeli, Saihnuni Sailo Memorial School

Category tinah hian Consolation prize pasarih theuh siam a ni bawk.

MADS Annual Art Exhibition 2025 hi Lianchhiari Run Art Gallery, DIPR building, Treasury Square ah November ni 4-14, 2025 chhungin chawhma dar 10 - tlai dar 4 thleng a duh apiang tan a tlawh theih dawn a. Artwork tarlan te hi lei theih vek a ni.