Chief Minister Pu Lalduhoma'n North Khawbung kum 100 tlin lawmna hmanpui

Hnahthial Post | November 7, 2025, Aizawl: Chief Minister Pu Lalduhoma chuan vawiin khan North Khawbung Centenary Committee (NCCC) buatsaih North Khawbung centenary (kum 100 tlin lawmna) chu khuallian niin a hmanpui a, Champhai North bialtu MLA leh Adviser to Chief Minister (Technical) ni bawk Er. H. Ginzalala chuan khual zahawm niin a hmanpui bawk.

Chief Minister Pu Lalduhoma chuan dar 11 khan centenary lungphun a hawng a, N. Khawbung mipui chuan hla do leh chawnglaizawn Chief Minister tan hian an lo buatsaih bawk a ni.

He hun zawh hian centenary lawmna hunpui Lalruanga Hmun, N. Khawbung Playground-ah hman nghal a ni a, Chief Minister Pu Lalduhoma chuan thu sawiin he hun ropui taka a tel thei hi lawmawm a tih thu a sawi a, N. Khawbung Lal ni thin Thanghlianga Sailo chu fakin he khaw ropui tak a din theih chhan pawh a fin leh remhriat em vang a ni tih a sawi. Mizo pi leh pute sulhnu tha tak tak a awm a, Art & Culture department-in a humhalh mek Lalruanga lung te a awm a, tha taka humhalh turin a fuih. Mahni khua tihmasawn tur chuan mahni vek an pawimawh thu sawiin mahni khaw tana tan la zela, hmangaih taka enkawl turin a fuih a, nimbu leh sapthei an chin te pawh hmasawnna rahbi tha tak a ni thei tih sawiin an hnathawhnaa taimak chhuah zel turin a chah a. Naupang leh thalai lehkha zir mekte an zirna atanga eizawnna tha tak hmua nun tha pan turin a fuih a, ruihhlo chi hrang hrang laka fihlim turin a chah bawk. Kum 200 an tlin hun pawha hlim taka an lawm theih nan kawtthler te, in sak dan te, tuichhe paih dan te leh khua enkawl dan te khuarei daih (sustainability) nen mil zawnga kal zel turin a fuih a, a tha zawnga miin an sawi an nih zel theih nan duhsakna a hlan a ni.

He hunah hian khual zahawm Er. H. Ginzalala chuan thu sawiin hun hlimawm tak hmang turin duhsakna a hlan a, Mizo mize nun mawi vawng nung reng turin a fuih a ni.

He hun hi N. Khawbung VCP Pu C. Tluangliana'n a kaihruai a, Pu C. Laltlanliana'n khuallian leh khual zahawm lawmna thu a sawi. Pu Roluahpuia Fanai chuan inhmelhriattirna leh thupuan hun a hmang a, malzai leh zaipawl hrang hrang ngaihthlak a ni bawk. TNT dintu Dr. Sangthankima lo tel vein thu a sawi bawk a, Pu Lalrinchhana Hlawndo chuan lawmthu sawiin hun a khar a ni. He hun zawh hian tlai dar 3-ah centenary ruai buatsaih a ni a, zanah concert buatsaih a ni bawk.