Edenthar, Aizawlah Skill Training kalpuina tur Model Centre hawn a ni

Hnahthial Post | November 5, 2025, Aizawl: Vawiin khan Pi Angela Zothanpuii, Director, School Education Department chuan kum 2025-2026 chhung atana Edenthar Veng, Aizawla Skill Training kalpuina tur Model Centre chu Edenthar Branch YMA Committee Room, Edenthar, Aizawlah a hawng a. He Skill Training hi Adult Education Wing, School Education Department hnuaia kum 2020-2021 atanga District hrang hrang leh Aizawl Veng thenkhata Critical Life Skills and Occupational Skill Development Programme tia lo kal chhohpui tawh chhunzawm zelna a ni a; tuna Edenthar Veng, Aizawl a Model Centre hawn hma hian he Skill Training-a Job Role hrang hrang atangin mi 482 chu hlawhtling taka training chhuak an lo awm tawh nghe nghe a ni.

Edenthar Veng a Skill Training kalpuina tur Model Centre hawnnaa khuallian Pi Angela Zothanpuii chuan, Mizoram chu literacy-ah 98.2% kan kai tawhin, India ramah ziak leh chhiar thiam vek ni hmasa ber State (First Fully Literate State) kan ni tih a sawi a, Literacy piah lama eizawnna leh hmasawnna atana pawimawh chi hrang hrang atan a theih ang anga hma lak zel a ngaih thu leh chutah chuan Skill Training hi a pawimawh thu a sawi a. Hmun hrang hrang atanga dil an awm laiin Edenthar Veng, Aizawlah hian Skill Training hi hlawhtling taka kalpui theih a nih beiseina avangin Model Centre hi hawn a nih thu a sawi a. Hemi atana Local Level Committee hruaitute leh Trainer leh Trainee-ten theih tawp chhuaha hma lak a nih ngei a beisei thu te, zirlaite pawhin eizawnna tlak ngeia taima taka an zir ngei a duh thu sawiin, tunlai khawvelah chuan Skill Development hi ngaih pawimawh a nih bakah eizawnna ngelnghet neih nan pawha thil tul leh tangkai tak a ni tawh a; kum thar lamah phei chuan zau zawk leh changtlung zawka kalpui theih an inbeisei thu a sawi bawk a ni.

Pi R. Lalnunthari, Joint Director of School Education pawhin thu sawiin, fund awm chhun ang ang inrenchem tak chunga hmang tangkaiin, kum dangah pawh Skill Training hi Adult Education Wing hnuaia hmalakna hnuaiah hlawhtling taka kalpui a nlo ih tawh thin thu leh, zirlaiten an skill zir chhuah hmanga sum leh pai an lak luh phah chhunzawm hlawm thu a sawi a; tuna Skill Training zir turte pawhin eizawnna ngelnghet neih phah nana hman ngei tuma zir turin a fuihin duhsakna a hlan a. He Skill Training Model Centre hnuaiah hian Job Role chi hrang hrang Cane & Bamboo Works, Tailoring, Electric/House Wiring, Baking Technology, Pickle & Jam making leh Critical Life Skills zir tur a ni a, a hawnnaah hian Training kalpui dan tur chi hrang hrang Local Level Committee, Trainer leh Trainee te tan inzirtirna sensitization neih nghal a ni bawk.