Energy Conservation pualin Zirlaite pual lemziak intihsiakna buatsaih a ni

Hnahthial Post | November 19, 2025, Aizawl: Vawiin khan Cultural Centre cum Auditorium Vaivakawn-ah Mizorama lemziak intihsiakna lawmman tam berna Painting Competition on Energy Conservation 2025 chu buatsaih a ni a. He painting competition hi Bureau of Energy Efficiency (BEE), Ministry of Power, Govt. of India buatsaih a ni a, Mizoramah chuan Directorate of School Education leh Tuirial Hydro Power Station, NEEPCO tangkawp ten an buatsaih thin a ni.

Kumina School level intihsiaknaah hian school 82 an tel a. Energy Conservation Painting Competition hi Group hniha then niin, group-A ah hian class 5, 6 leh 7 chin a huam a, Group-B in class 8,9 leh 10 a huam a ni. School level inelnaah hian Group-A ah naupang 1185 telin, Group-B ah 830 an tel thei a, school level a titha group-A atangin 50 thlan chhuah an ni a, Group-B atangin 50 thlan chhuan an ni. Heng naupang thlan chhuah 100-te hian vawiin khan “on-the -spot State Level Painting Competition” hi an hmachhawn a ni.

Vawiina State Level Painting Competition-ah hian School Education Director, Pi Angela Zothanpuii, MCS chuan khuallian niin a hmanpui a ni.

Group A leh B a lawmman pakhatna atanga Pathumna te hian National Painting Competition, New Delhia December 2025 a neih turah Mizoram ai an awh dawn a ni. Lawmman pakhatna atanga pathumna lak dan chu hetiang a ni

Group A.

1st - Vanlalmalsawmsaka, Don Bosco School, Khawruhlian

2nd - Chinnawihnemi, Tuithaveng UPS, Kolasib

3rd - H. Malsawmzuali, PES, Keifang te niin

Group B

1st - Angela Lalrinmawii, Divine Intervention School, Zonuam

2nd - Hannah Lalchawisangi, St. Paul's Higher Secondary School

3rd - C. Nochhingia,Lorrain English School te an ni. Group A leh B atang hian Consolation Prize dawng mi 10 ve ve thlanchhuah an ni bawk.

Lawmman pakhatna hian ₹ 50000 leh Certificate a dawng a, Pahnihna hian ₹ 30000 leh certificate leh Pathumna hian ₹ 20000 leh Certificate an dawng a Consolation Prize dawngtu te hian lawmman ₹ 7500 leh Certificate an dawng veleh thung a ni.