Hnahthial District-ah World Day For Prevention of Child Abuse pualin Vehicle Rally neih a ni

Hnahthial Post | November 19, 2025, Hnahthial: Vawiin khan Hnahthial District Child Protection Unit bultumin khawvel pum huapa Hleihlenna laka Naupangte Venna Ni - World Day for Prevention of Child Abuse pualin lirthei hmanga kawng zawh - Vehicle Rally neih a ni a. Bazar Veng kawn atanga zawh tan niin Electric veng bazar leh Govt. High School lamah te kawng zawh a nih hnuah Chanmari veng, Nauhruaikawn ah kharna hun hman a ni.

Vehicle Rally hawnna programme hi Bazar Veng kawnah neih niin District Child Protection Officer, Dr. R. Lalrinhlua chuan a kaihruai a. He hun hman chhan sawifiah nghalin mipuiten naupang hleihlenna tawk thinte himna kawnga hma an lo lak ve theih nan a nih thu a sawi a. Naupang kan tih chu kum 18 la tling lo te an nih thu leh mihring enkawlna kawng hrim hrimah hian an upat tawh hnu, a ler atanga thuai lova, an naupan lai atanga uluk taka enkawl a tul thu a sawi a. Mizoram Child Welfare Committee (CWC) hnuaiah Naupang chunga hleihlenna avangin case tam tak a luh tawh thu tarlangin April 2024- March 2025 chhung khan CWC hnuaiah case thar 1566 a luh thu a tarlang a. Heng zingah hian retheihna avangin case 415 awmin nu leh pa, fate enkawl tlak lo avangin case 361 a awm a. Hei bakah hian hur sualna lam rawng kai (Sexual abuse) avangin case 158 a awm tawh thu tarlangin mipuite chu heng naupang tanpui ngaite hria an awm a nih chuan engtik lai pawhin 1098 ah call theih an nih thu a tarlang a ni.

Pu Hmingthanzuala, Sub Headquarters YMA President chuan thu sawina leh Rally flag off-na hun hmangin DCPU chu department naupang te mah ni se hmalakna tha tak tak an nei thin chu lawmawm a tih thu a sawi a. Hna thawktute chu nu leh pa nei lo te tan nu leh pa an ni tih in hre reng chunga rawngbawlna rilru nen hna tawk zel turin a chah a ni.

Electric Veng Bazarah hun hman leh niin Pu C. Lalhlimpuia, Observation Home Superintendent chuan thusawina hun tawi a hmang a. Naupangte chunga hleihlenna kan do rualin naupangte pawh an thil tihsual en liam mai lova, mihring tha tak an nih theih nan uluk taka fuih a, zilh a, a tul huna hrem a pawimawh thu a sawi a ni.

Pi R. Lallawmkimi, Legal Probation officer chuan Govt High School bulah thusawina hun hmangin naupangte kan enkawl danah kan fimkhur a tul thu a sawi a. Naupangte diriam deuhva tawng khum thin a pawi thu sawiin an upat hnu thlengin pawimawh lo ni a inhriatna leh mahni insitna a thlen theih thu a sawi.

Pu C. Lalremsanga, CWC member chuan rally kharna hun, Nauhruaikawnah hmangin kum 2025 chhungin Hnahthial District-ah kawng hrang hranga naupangte chunga hlehlenna case 107 report a awm thu a tarlang a. Hur sualna rawng kaia naupang chaklo zawkte tihbuaina a hluar thu tarlangin chungtianga che thinte chu dan angin na taka hrem theih an nih thu a sawi a. Naupangten an taksa peng hrang hranga khawih phal lai leh phal loh an hriat a tul thu sawiin kan zirtir uluk a tul thu a sawi a. Naupangte hi kan naktuk atan mai ni lovin kan tun hun atan pawh an ni tih mipuite chu hre theuh turin a chah bawk.