School Education Minister-in Edutech Fest & Career Fair 2025 a hawng

Hnahthial Post | November 19, 2025, Aizawl: Dr. Vanlalthlana, Minister, School Education Department chuan vawiin khan SCERT Courtyard-ah State Council of Educational Research & Training (SCERT) buatsaih, ni hnih awh tur, EduTech Fest & Career Fair 2025 hawnna hun chu khuallian niin a hmanpui a. He hunah hian Pu Malsawmzuala Ralte, Chairman, Mizoram Youth Commission chu khualzahawm a ni.

Khuallian Dr. Vanlalthlana chuan technology kan hman tangkai thiam chuan ram pumin hma a sawn dawn a ni, tiin, AI leh technology hmang thiam chu an dinchan dawn avangin hemi mila zirna her rem a, mahni intuaihriam a ngai tih a sawi a. Kan literacy rate sang mah se thiamnain a um zui loh chuan awmzia a awm loh thu sawiin, PARAKH (Performance Assessment, Review, and Analysis of Knowledge for Holistic Development) exam-ah Mizo zirlaite’n state danga an zir rualpuite an tluk loh hle avangin tan lak a ngaih thu a sawi.

Minister chuan World Economic Forum chhut dan chuan kum 2030-ah AI chuan khawvel pumah hna maktaduai 85 a luahlan ang a, hna thar maktaduai 97 vel a siam dawn tih a sawi a. Zirlai kalkhawmte chu AI nen hna an inchuh dawn avangin, tunlai mil thiamna – digital literacy, communication skills, financial literacy, leh tourism thang zel dawnsawn nan social skills leh hospitality – lam bawh zel turin a fuih a. Mahni kutkawiha ding thei, mi rawih ni lova mi ruaitu, hna zawngtu ni lova hna siamtu ni tura inpuahchah thiam zel turin zirlaite chahin, sawrkar pawhin chutianga kaihruai thei turin hma lak zel a tum a ni, a ti.

A thusawi zawh hian School Education Minister chuan EduTech Fest & Career Fair 2025 chu hawngin, Pu Lalhruaitluanga lehkhabu ziah, ‘Zirna Lamtluang: Roadmap to Higher Education’ copy 15 chu he fest chhunga sem turin SCERT hnenah a hlan nghal a ni.

Khualzahawm Pu Malsawmzuala Ralte pawhin thu sawiin, tunlai khawvelah entrepreneurship development leh skill development te a lar ta hle a, mahni kutke, ngaihtuahna fim hmanga thil siam chhuak, duang chhuak, thil awm tawh sa hmang tangkaia taima taka beitute chu sang takah an invawrh thin a ni, a ti a. Zirlaite chu theihna inang vek nei an ni a, an thawhrimna leh tumruhnain danglamna a siam dawn a, thawh a huna nasa taka an thawh chuan, a hnu lama harsatna an pumpelh dawn a ni, tiin a fuih a. Nih tum nei ngei turin a chah bawk a ni.

MYC Chairman chuan MYC hmalakna hrang hrang a tarlang bawk a. Coaching class chi li an kalpui atanga zir chhuak mi 94-te chu sawrkar hnaa an inziahtlin tawh thu te, British Army form an fill up-pui zinga mi 5 chu British Army-a an luh tawh thu te, India–Taiwan Labor Mobility Agreement 2024 hnuaiah Mizo thalai 50 chu Taiwan-a hna thawk tura thawn an nih tur thu te, Japan-a caregiver tur te, Germany-a nurse tur te, India rama hotel changkanga spa therapist hna thawk tur te an thawn chhuah thin thu leh Food and Beverages Training Programme an kalpui thin thu te a tarlang a ni.

Thusawitu dang, Pu T. Lalhlimpuia, MLA, 32-Lunglei West chuan zirlaite chu lunghlu thuhruk an ni a, an hlutna lanchhuahtir tura an beih a ngai tiin a fuih a. Tunlai khawvela AI leh technology pawimawhzia sawiin, thiamna (skill) nei tan chuan khawvelah remchanna a tam a, remchanna uma man apiang chu mi hlawhtling an ni thin tih a sawi a ni.

Hawnna hun hi Pi Caroline Zoramthangi, Director, SCERT chuan kaihruaiin, inlawmna thu a sawi nghal a. NEP 2020 leh NCF 2023-in a ngaih pawimawh em em kawng engkima hmasawnna (holistic development) naupangten an neih theih nan he fest hi buatsaih a ni a, experiential learning atana thil tangkai tak a ni bawk tih thu a sawi a. Dr. Lalduhawmi Thomte, Joint Director, SCERT atangin report tawi ngaihthlak niin, Pi Zoramthangi Ralte, Joint Director, SCERT-in lawmthu sawiin hun a khar a. Pi Angela Zothanpuii, Director, School Education Department, Pu JH Zoremthanga, Chairman, MBSE, Pi Sarah Lalengzami Pachuau, Secretary, MBSE, Pu JH Lalbiakliana, CEO, Mizoram KVI Board, Dr. Malsawmdawngliana Lailung, Member, MYC, Samagra Shiksha leh DIET Aizawla thawktute leh sikul hrang hrang Principal leh Headmaster-te bakah sikul naupangte an tel a. Ni hnih chhung hian sikul 42-te chu he Fest & Fair hi chhim tura sawm an ni.

Dr. Lalduhawmi Thomte, Joint Director, SCERT report atanga hriat danin kumin hi EduTech Fest leh Career Fair thlunzawma hman a nih vawi khatna a ni a. SCERT hi kum 1980 khan Education Department hnuaiah Academic Wing-a din a ni a, Kum 2008 khan Directorate of School Education atangin a hrangin a ding a, a hnuaiah DIETs (District Institutes of Education and Training) 8 a awm zui ta a ni. Kum 2023 atang khan Career Awareness hmun 6-ah neih a ni tawh a, Kum 2019 atang khan school 49 huapin Career Exhibition neih a lo ni tawh bawk a ni. 6-Month Certificate Course in Guidance and Counselling chu kum 2021 atanga tanin batch 3 an awm tawh a, zirtirtu 93-in an zir chhuak tawh bawk a ni. SCERT hnuaia ICT Cell chuan kum 2023 atang khan EduTech Festival hi kum tin nei turin hma a la tan a, kumin hi a vawi 3-na tur a ni. Technology hian tangkaina tam tak nei mah se, a tha lo lama hman theihna a tam em em avangin, SCERT ICT Cell chuan zirna atana tangkai zawka technology hman dan tur kawng hrang hrang a ngaihtuah a. Zirlai pui thei tur learning content siamin education pual liau liau TV channel 2 leh YouTube channel-ah Live-in an pe chhuak thin a. Zirtirtute tan ICT hmanga zirna kalpui dan training te pein, learning content bakah assessment an buatsaih bawk a, chu chu textbook-a QR code hmangin a luh theih a. He App hmang hian zirtirtu tam tak online training an pe tawh bawk. Preschool atanga Class 10 zirlaite tan virtual headset hmanga 3D content en theih turin Virtual Lab an nei bawk a. Hei hi zirlaiten an chhim thei reng a ni. 1st November 2025 atanga tan in DIKSHA ah ECCE for Anganwadi workers training pek mek a ni a, February ni 15, 2026 thleng a awh dawn a ni.

EduTech Fest & Career Fair 2025-ah hian stall 22 a awm a. He Festival-ah hian NEP 2020 in a ngaih pawimawh em em, zirna atana technology hman tangkai theih dan chi hrang hrang pho chhuah leh inhrilh hriat a ni dawn a ni. Hemi bakah hian zirlaite zirna sang zawk an zir zelna tur leh zir chhunzawm thei lo ten eizawnna kawng an zawh theihna tur hrang hrang pho lan a ni. Stall awmte chu:

1. LushAITech

2. Mizoram Khadi & Village Industries, New Capital Complex

3. Mizoram University (Department of Electronics & Communication Engineering)

4. Mizoram Youth Commission

5. Women's Polytechnic, Aizawl

6. Hills Technology Consultancy & Service Pvt. Ltd.

7. Pixel Play

8. ZoCareer Solutions

9. The Book Café Aizawl

10. Japanese Centre of Excellence (JACEEX)

11. AdmissionIndia

12. SAINIK Welfare & Resettlement