Hmeichhiate chunga hleilenna thleng thin tih bo kawnga hmalakna tur, Gender Based Violence (GBV) Solve Project a hawng

Hnahthial Post | November 6, 2025, Aizawl: Pi Lalrinpuii, Minister, Social Welfare, Women and Child Development Department chuan vawiin khan a Office Chamber, MINECO, Khatlaah hmeichhiate chunga hleilenna thleng thin tihbo kawnga hmalakna tur, Gender Based Violence (GBV) Solve Project a hawng. He project hi Aparajita leh J-PAL South Asia tangkawp hmalakna niin, Mizoramah chuan Mission Foundation Movement (MFM)-in a kalpui dawn a ni.

Social Welfare Minister chuan Mizorama hmeichhe chunga hleilenna pun nasatzia tarlangin, kum 2022-2023 chhung khan Women Helpline-ah case 3094 report a awm a, February 2025-ah chuan case 12750-ah a sang chho tih a sawi a. GBV tihbo lama hmalakna chu kan ramin a mamawh takzet a ni, tiin, hmeichhe dinhmun a that chuan chhungkua a thang a, khawtlang pawhin hma a sawn thin a ni, a ti.

Minister chuan GBV Solve Project chuan hmeichhe chunga hleihlenna chungchang ringawt bitum lovin naupang (mipa leh hmeichhia) ten hemi chungchang zirtirna nasa tak an dawng dawn bawk a, hmeichhe chawmdawl ngaite eizawnna tlak khawpa thiamthil zirtirna a keng tel dawn bawk a ni, a ti.

Pi Zoramthangi Chhangte, Director, Women and Child Development Department pawhin an department hnuaia project an kalpui mekte tarlangin, Mission Foundation Movement nena hmeichhiate chunga hleilenna do kawnga an thawkho thei tur chu lawmawm a tih thu a sawi a ni.

Thusawitu dang, Pu Lalramchuanzela, Executive Director, Mission Foundation Movement chuan sawrkar hmalakna tam tak puibawm a, nasa zawka Mizo hmeichhiate dinhmun dawm kan nan he project hi kalpui a nih tur thu a sawi a.

Aparajita leh J-PAL South Asia Team atanga lo kalte’n thu sawi bawkin, J-PAL chu retheihna atanga mi chawi kan dan zirchiangtu research organisation a nih thu leh GBV Solve Project chu an organisation thil vei pakhat, hmeichhe chunga hleihlenna thleng thin tihbo nana duan a ni a, kum 2 chhung an zir chian hmasak hnua he project atana hma la chauh an nih thu an sawi a.

GBV Solve Project atan hian proposal 470 chuang lutin, tehna hrang hrang hmanga an thlitfim hnuah India rama organization 6 he project khawih tur hian an thlang chhuak a. He’ng zingah hian Mission Foundation Movement (MFM) chu a tel a. MFM hian Aizawl district-a hmeichhiate chunga hleilenna thleng thin tihbo nan mahni invenna, mipui hrilhhriatna leh a tuartute enkawl kawngah WCD nen tangkawpin hma a la dawn a ni.

Hawnna hunah hian Social Welfare, Women and Child Development Department hotute - Pi Lalzarmawii, Commissioner & Secretary, Pu Lalnunhlua, Additional Secretary, Pi Zonunthari, Joint Secretary te bakah MHIP aiawhin Prof. Irene Lalruatkimi leh MFM aiawhte an tel a ni.