Hnahthial DAO Office chuan RAD hnuaia hmathatna dawng tur kuthnathawktute tan training buatsaih

Hnahthial Post | November 18, 2025, Hnahthial: Vawiin khan DAO Conference Hall-ah Hnahthial District Agriculture Officer, Pi Julie Zodinpuii kaihhruaiin sawrkar laipui hmalakna, Rainfed Area Development (RAD) hnuaia hamthatna dawngtute tan training buatsaih a ni a. Resource person, Pu Timothy Lalrinfela'n khuai khawi (apiculture) chungchang ziritrna pe in Dr. David Malsawmdawngliana'n ran vulh (livestock) chungchang zirtirna a pe bawk.

DAO, Pi Julie Zodinpuii chuan RAD chungchang hrilhfiahna tawi neiin Central scheme a nih thu leh ruahtui ringa kuthnathawktuten khuarel chhiatna hrang hrang avanga hlawhchhamna an lo tawh palh pawha sum lakluhna peng dang an lo neih ve theih nana duan a nih thu a sawi a. A theih ang anga scheme hrang hrang nena kalkawptir tum a nih thu sawiin thlai chin emaw ran vulh emaw thlan a tul thu a sawi a. Hei bakah hian heng trade pali (4)- khuai khawi (Apiculture), Fisheries, Silage (ran chaw siam) leh Vermicompost (changpat hmanga lei tha siam) zinga pahnih (2) tal hi thlan tel a tul thu a sawi bawk.

He capacity building programme-ah hian Cluster pali (4) - Saibu zau (Rotlang E), Mat zau (Pangzawl), Tiauzau zau (Lungmawi) leh Ngawizawl zau (Tarpho leh Khawhri) atangin beneficiaries 110 vel kalin mi pakhat tan Rs 30,000 theuh Direct Benefit Transfer (DBT) hmanga hlan an ni ang.

Heng scheme tana beneficiaries thlan leh hmalak chhunzawm hi KVK, ATMA leh scheme hrang hrang NFSNM, MNREGS, MIDH, SRLM, Fisheries Dept leh adt. nen a theih chin chin ah kalkawptir dan zawn tur a ni bawk.

Capacity Building programme zawh hian National Food Security & Nutrition Mission (NFSNM) hnuaiah pulses bakah National Mission on Edible Oils hnuaiah Oil seeds ( hriak nei chi thlai) chungchang training neih chhunzawm nghal a ni.