Rajasthan Minister of Panchayati Raj and Education-in Mizoram lo tlawh

Hnahthial Post | November 18, 2025, Aizawl: Pu Madan Dilawar, Hon’ble Minister of Panchayati Raj, Education, Govt. of Rajasthan leh amah zuitu official leh Panchayati Raj member hrang hrang mi 21-te chuan, Ministry of Panchayati Raj (MoPR) hnuaia Scheme pawimawh tak, Rastriya Gram Swaraj Abhiyan (RGSA) hnuaia hnathawh hrang hrangte rawn en thlithlai pahin Mizoram Exposure Visit an rawn nei a; vawiin chawhma khan Prof. Lalnilawma, RD&AD Minister chuan a Office chamber-ah lo kawmin sawrkar hmalak dante sawi hona hun an hmang a; RD&AD Commissioner & Secretary Pu R. Zarzosanga bakah department hotu dangte pawh he hunah hian an tel a ni.

Prof. Lalnilawma chuan, Mizoram ngai pawimawha rawn tlawhtu Pu Madan Dilawar leh amah zuitu official-te’n hetianga intlawh chhuahna hun an rawn nei chu, lawmawm a tih thu sawiin, ram leh ram intlawhtawna, inzirtawn thin chuan rah tha tak a chhuah zel a beisei thu a sawi a; thingtlang hmasawnna atana hmalakna hrang hrangahte pawh, hna thawh dan tha zawk leh chin dan tha zawkte (best practices) chhar chhuaha, in-share tawn zel theih a nih tur thu sawiin lawmawm a tih thu a sawi a; Pu John Lalnunsanga, State Programme Manager, RGSA hnen atangin Rastriya Gram Swaraj Abhiyan (RGSA) hnuaia hnathawh hrang hrangte report ngaihthlak a ni bawk.

Pu Madan Dilawar, Hon’ble Minister of Panchayati Raj pawhin thu sawiin RD&AD ten an lo dawnsawn dan chu fakawm a tih thu a sawi a; Minister zuitu mi dangte pawhin Mizoram chu nuam an tih thu leh, sik leh sa mai bakah ramngaw, thing leh mau te chu hmuhnawm an tih thu sawiin, mizo mipuite hawihhawmna chu mawi an tih thu an sawi a, Rajasthan tlawh ve thuai turin RD&AD Minster leh a thawhpuite chu an sawm nghal bawk a ni.

Pu Madan Dilawar-a leh a hote hian vawiin vek hian Reiek leh Ailawng-a RGSA Scheme hnuaia hnathawhte tlawh lehin, sawrkar hmalakna hrang hrangte an thlir ho dawn a, chawhnu lamah RD&AD Minister Prof. Lalnilawma leh Education Minister Dr. Vanlalthlana hovin Tourist Lodge, Chaltlangah inkawm hona hun hmang lehin, ruahman dan chuan, naktuk November 19, 2025 hian Falkawn-a Zokhua leh ZMC&H te tlawhpui an ni leh bawk dawn a ni.