Minister Prof. Lalnilawma’n Union Bank of India Saitual Branch a hawng

Hnahthial Post | November 11, 2025, Saitual: Vawiin khan Prof. Lalnilawma, Minister of State chuan Union Bank of India (UBI) Saitual Branch chu Keifang Police Veng-ah a hawng.

Vawiin UBI, Saitual Branch hawnna inkhawm atana khuallian Prof. Lalnilawma chuan thu a sawi a, UBI Saitual Branch hawn a ni chu lawmawm a tih thu sawiin, Saitual District tan hmasawnna rahbi pawimawh tak a ni, a ti. Minister chuan bank leh mipuite chu inmamawh tawn reng an ni tih sawiin, bank leh mipuite chuan thawhhona tha tak an neih a pawimawh thu a sawi.

Khuallian chuan Bank tangkaina te a tarlang a, loan lak nan te leh sum khawl nan a tangkai tih sawiin, Mizo mipuite chuan bank-ah te sum khawl (savings) neih uar a pawimawh thu a sawi. Minister chuan UBI Saitual Branch chu an kal zelna turah a duhsakna a hlan a, mipui dawrna kawngah te hawihhawm takin, theih tawp chhuah turin a chah nghal a ni.

Union Bank of India (UBI) Saitual Branch hawnna inkhawm hi Pu C. Vanlalruala, Manager, UBI chuan a kai hruai a, Rev. Lalsanglura Sailo, BCM Saitual Pastor bialin hunserh a hmang a ni. Pu Srabana Kumar Pradhan, Deputy Regional Head, Regional Office, Jorhat chuan inlawmna thu sawiin, khuallian Prof. Lalnilawma leh Saitual Bawrhsap Dr. Lalngura Tlau te chuan thu an sawi bawk a ni. Vawiin inkhawm hi Pi Florence L Joute chuan lawmthu sawinain a khar a ni.

Union Bank of India hi India rama public sector bank lian ber panga (5)-na niin ni 11 November 1919 khan India hnampa, Mahatma Gandhi-in a hawng a. UBI headquarters hi Mumbai-ah awmin, vawiin November ni 11, 2025 hi kum 107 a tlinna chiah a ni. 1st April, 2020 khan Andhra Bank leh Corporation Bank te nen thlunzawm a ni a, India ram pumah leh ram pawnah te branch 8600 chuang, ATM 10000 chuang leh thawktu 74,100 chuang zet an awm a. Ram pawnah hian Dubai International Financial Centre (UAE), Sydney (Australia), London (UK) leh Malaysia-ah te branch, banking subsidiaries leh joint ventures ang tein an inzar pharh bawk a ni. Bank-in kumin a deposit leh advances zawng zawng hi ₹ 22.14 lakh crore niin, kum hmasa aiin 5% laiin a pung a ni.

UBI innghahna thupui (motto) hi "Good people to bank with" tih a nih anginm i zawng zawng huapzo tak leh mipui te hamṭhatna atan hian a thawh hlawk hle a, heng RAM segment- Retail, Agriculture leh MSME aṭanga bank-in advances a pek chhuah hi 57% lai a ni. Tin, Gross NPA (Non Performing Assets) hi 3.52% leh net NPA hi 0.62% laiah a tla hniam a, Capital Adequacy Ratio hi 18% a ni bawk a ni. India rama public sector bank te zinga zaa za core banking solution pe thei hmasa ber a ni bawk.