MSCPCR-in MHIP tan Sensitization cum Consultation Workshop on Child Labour with Special Reference to Under Aged Domestic Workers buatsaih

Hnahthial Post | November 21, 2025, Aizawl: Vawiin, khan Planning Department Conference Hall-ah Mizoram State Commission for Protection of Child Rights (MSCPCR) chuan naupangte dikna chanvô, a bik takin inchhung khura inhlawhfak (Awmpui) chungchângah Consultation Workshop a buatsaih a. He hunah hian Mizo Hmeichhe Insuihkhawm Pawl (MHIP), Gen. Hqrs. hruaitute leh Aizawl-a MHIP Branch hrang hrang te an tel.

He hun hi Pi Lalengvari, Secretary, MSCPCR chuan a kaihruai a. MHIP leh MSCPCR te chu hmeichhe naupangte dikna leh chanvô humhim kawngah thawhhona tha an neih a pawimawh thu sawiin, MSCPCR te chu an inhawn reng thu a sawi. MHIP te chu inthlahrung hauh lova harsatna an neih te MSCPCR hnena thlen thin turin a chah bawk a ni.

Pu Jimmy Laltlanmawia, Chairperson, MSCPCR chuan kalkhawmte lawmna thu a sawi a. Mizo naupangte tâna MHIP-te hmalak tawhna te chu ropui a tiin, MHIP-te nena tangrualin State danga hmeichhe naupang an chhanchhuah tawh thu te a târlang a ni. Pu Jimmy a chuan, nu leh pate lakah ngêi pawh naupangte an him tawh loh thu târlangin, hmâ lak a tul takzet thu a sawi a ni. Khawvêl changkâng zelah awmpui mamawhna a sâng zêl a, Mizoramah pawh awmpui tel lova awm thei lo kan awm tak nûal avângin hetiang kaihnawih dân kan hriat leh kan zawm a pawimawh thu a sawi bawk. Singapore sawrkar hian awmpui chhawr chungchângah dân tha tak a nei a, an ramah chuan awmpui ni turin kum-21 an tlin ngei ngei a ngaih thu a sawi bawk a ni.

Pi Priscilla Lallawmsangi, Legal Officer, MSCPCR leh Dr. HTC Lalrinchhana, Registrar, Gauhati High Court (Aizawl Bench) te chuan zirtirna pein, naupangte dikna chanvô, a bik takin awmpuite chungchânga hriattur pawimawh, dânin a tarlante zirtirna hun an hmang.

Dr. HTC Lalrinchhana chuan kumtlinglo naupangte chhawr chungchânga dânin a sawi pawimawh zual te chu hetiang hian a târlang :-

1. An hnathawh phalsakna hmunah pawh chawlh lailawk awm lovin darkâr-3 aia rei chhawr phal an ni lova. An hnathawh kârlaka chawlh hi darkâr-1 tal a ni tur a ni.

2. An hnathawh rei zâwng belhkhawm hi ni-1 ah darkâr-6 aia rêi a ni tur a ni lo.

3. Zan dâr-7 leh zîng dâr-8 inkâr chhûngin hnathawka chhawr phal an ni lo.

4. An hnathawhna hmun hnathawh dârkâr bituk aia tlai (overtime) in chhawr phal an ni lo.

5. Nikhatah hmun khat aia tamah hnathawka chhawr kawi hi phal a ni lo bawk.

6. Tleirawlte hnathawka chhawrna hmunah chuan ziaka chhinchhiahna (Register) hi sawrkar thuneitu (Inspector) enfiah theihin vawn ngei ngei tur a ni, chuta ziah luh (record) tur te chu :-

i) Hnathawka chhawr tleirawl hming leh kum zah

ii) Tleirawlte hnathawka chhawr rei zawng dârkâr zah leh an chawlh lailawk dârkâr bi

iii) Eng hnathawk berah nge chhawr an nih

iv) Chhinchhiah ngâi tul dang bithliah a awm chuan

7. Tleirawlte hnathawhna hmun leh hmâ, an hriselna leh himna atâna cheibawl chungchângah sawrkar laipui emaw, State sawrkar emaw, chulai hmuna thuneitu emaw zawk zawk chuan inkaihhruaina (rules) a siam ang.

8. Tleirawlte hnathawka chhawr an nih pawhin chawlhkâr khatah ni-1 tal nilêngin chawlh hahdamna hun an nei tur a ni a, an hnathawhna hmun neitu hian an hnathawhna hmun langsar lâiah he an chawlh nî tur hi a târ chhuak ngei ang a, thla-3 danah vawi-1 bak hemi chawlh nî tur hi tihdanglam theih a ni lo thung.

Dr. HTC Lalrinchhana chuan naupang kum tlinglo hnathawka chhawr hian naupangte thanlenna kawngah nghawng tha lo tak a neih theih avangin he dân - “The Child & Adolescent Labour (Prohibition & Regulation) Act, 1986” hi zirchîang a, ngaipawimawh turin Mizo mipuite a chah bawk a ni.