Chief Minister-in All India Radio kum 90 tlin lawmna hmanpui

Hnahthial Post | June 9, 2026, Aizawl: Nimin khan All India Radio Aizawl Station chuan All India Radio-in kum 90 a tlinna leh All India Radio Aizawl Station-in kum 60 a tlin lawmna an buatsaih chu Chief Minister Pu Lalduhoma chuan a telpui. All India Radio Aizawl Station-ah Jubilee lungphun a hawng a, Drama Studio-ah Interview tawi a nei a, hla a thlang a, chumi zawhah a lawmna pui ber Vanapa Hall-a neihah khuallian niin a tel a. Pu B. Lalchhanzova, Minister, IPR & PS, Pi Baryl Vanneihsangi, MLA (Ex Radio Jockey), Pi Betsy Zothanpari Sailo, Secretary, IPR & PS, Pi K. Vanlalsangi, MIS, Director, I&PR leh I&PR officers ten an tawiawm.

Thusawiin Chief Minister chuan, All India Radio-in kum 90 a tling ta hi India ram tana hun chhinchhiahtlak a tling a. Akashvani hi hun rei tak chhung chu kan ramin Mass Communication hmarua kan neih chhun a ni thin a. India Independence kan sual lai ata vawiin thlengin sorkar leh mipuiten kan chhawr tangkai em em a ni.

Kum 1966-ah Mizoram a lo buai a, July ni 31 khan, 150 Watt Transmitter hmang Aizawl Radio Station a lo ding a. Zan lamah chauh programme an tichhuak nain mipuiten kan hlut hle. Curfew a zingin a rei thin bawk si a. Curfew an han puan lah khan, a hma zawng zawnga inkhawm ngai lo pawh khan inkhawm kan han chak thar a, nula rima chhuak ngai lote pawhin nula rim kha kan chak ta ut ut mai thin a. Chutianga, boruak tawt tak hnuaia kan awm lai zawng zawnga kan inhnangfakna ber chu All India Radio, Aizawl kha a ni. Biak ina inkhawm thei lo mipuiten Pathian fakna hla Radio kaltlanga an han ngaithla thin te kha, a hlutzia sawifiah thiam phak a ni lo.

Chuvang chuan, All India Radio Aizawl hi thuthar thehdarhtu a ni ringawt lo va, Mizo mipuite thian tha, min awm tleitu a ni thin.

Mizo ṭawng hman dik chungchangah pawh All India Radio Aizawl hi a entawn tlak hle a. Thuziak leh puanchhuah kawnga an fimkhur avangin rin pawh a hlawh a. Mizo tawng a thehdarh rualin a humhalh tel bawk a, a hnathawh hi a hlu hle.

Tin, Radio hi a thlen chin a zau avangin kan thenawm ram Myanmar leh Bangladesh atangte pawhin an lo ngaithla ve zel a. Chu chuan Zofate inpumkhatna kawngah nasa takin min pui. Lusei tawng, kan Common language-a kan hman chhoh takna kawngah pawh hian a thawhhlawk hlein ka hria.

All India Radio Aizawl-a thawk News Editor pahnih Pu HC Vanlalruata leh Pu Issac Zoramsangate chu nikum khan 46th Annual News & Documentary Emmy Award, 2025 hlan an ni a. Mizo zinga hetiang Award dawng thei awm chhun hi an la niin ka hria. Anni pahnih hian Mizoram Journalism History-ah bung thar min kaipui a, khawvelah Mizote min tihmingtha a, an hlawhtlinna hian AIR Aizawl hi a quality a tha tawk tih min hrilh a ni.

Vawiina lo kal khawm, kan Journalist-te hian kan ram chanchin ram pawna thehdarh hi lo uar deuh deuh rawh u. Google-in Mizo tawng a lakluh atang khan Artificial Intelligence hmangin Mizo tawng hi awlsam takin tawng dangin a lehlin theih tawh a. He remchanna hi thiam takin i hmang ang u.

Social Media Platform chi hrang hrang a lo chhuak ta uaih uaih mai a. Information hi kan mamawh aia tam, kan ei sen loh kan dawng ta a. Hei hian kan nunah a tha zawnga nghawng tam tak nei mah se, a chhe zawnga min hruaina pawh sawi tur a tam hle. Hetiang boruak kara kan chen tak avang hian All India Radio Aizawl leh kan Media House te, a bik takin sorkar Accreditation nei chinte hi chu mipuite tana rin ngam, thudik puangtu, palai rinawm ni tura ngaih in ni.

Kum 60 chhunga Aizawl Radio Station-in mipuite tana hna a thawh nasatzia leh a hlutzia hretute zinga mi ka ni a. Mizo mipuite hian AIR Aizawl chungah hian lawmthu sawi tur kan niin ka hria. A tir atanga he station lo enkawl tawhtute zawng zawng chungah lawmthu ka sawi a. Vawiin thlenga nung taka kalpui zeltute kan chhuang che u a ni, a ti.

Vanapa Hall-a inkhawmah hian Pu DR. Lalropuia, Director & Cluster Head chuan kal khawmte lawmna thu a sawi a, All India Radio Documentary thlirhona neih a ni a, hranghlui zaithiam leh thangthar zaithiamten hun an hmang a, Costume Parade entir a ni bawk. Pu Biakchungnunga, Head of Programme chuan lawmthu sawiin a lawmna inkhawm hi a khar a ni.

All India Radio chanchin tlangpui:

Kum 1923 ah khan Radio Club of Bombay ten India rama a hmasa ber atan Radio Service an kalpui tan a. He mi kum vek hian Madras leh Calcutta-ah pawh kalpui an awm bawk a. Kum 1927 ah Indian Broadcasting Company (IBC) a lo piang ta a ni. Bombay leh Calcutta-ah bawk bul an tan a. Kum thum hnuah, 1930 ah an tla chhe leh rih a.

British sorkar khan April ni 1, 1930 ah Indian State Broadcasting Service tiin hma thar an la a. Kum 1936 June ni 8-ah All India Radio tiin a hming an thlak a.

Kum 1942 velah khan Independence Movement kalpuitu lamin Underground Congress Radio an rawn kalpui ta a. Mipuite thinlungah hna a thawk nasa hle a. Zalenna sual turin a suihkhawm a, independence movement hmanraw tangkai ber zinga mi a ni.

Kum 1957 khan a official hming atan Akashvani (Voice from the sky) tia thlak a ni a. Vawiinah chuan khawvela Radio Network lian ber, ṭawng hrang hranga thupuang darh tam ber a lo ni ta a ni. Tawng chi 23 leh chibil tawng (dialect) 146 chuanga ngaihthlak theih a ni a, India ram Geographical area za zela 92% a tuam chhuak tawh a, ram mipui 98% hnen a thleng mek a ni.

Kum 2024 a Oxford University-a Reuters Institute for the Study of Journalism-in Digital News Report 2024 a tihchhuahah Akashvani News hi India rama News puanchhuahna rintlak ber a nih thu a puang nghe nghe.

Kum 1957, Akashvani tia a hming an thlak kum, April ni 1-ah khan Gauhati atangin Mizo Programme tihchhuah tan a ni a. Kum 1966 July ni 31 khan, 150 Watt Transmitter hmang Aizawl Radio Station chu a ding ve ta a ni.