New Delhi-ah Tourism Minister Pu Lalnghinglova Hmar leh NITI Aayog member Dr. VK Paul te inkawm

Hnahthial Post | November 10, 2025, Aizawl: New Delhi-a cham mek Pu Lalnghinglova Hmar, Minister of State, Tourism Department leh Dr. VK Paul, Member, NITI Aayog te chu vawiin chawhnu khan New Delhi-a NITI Aayog Headquarters-ah an inkawm a, Mizoram tourism hmasawnna tur chungchang ngaihtuahin hma lakho dan tur an sawiho.

Mizoram Tourism Minister Pu Lalnghinglova Hmar chuan tunhnaiah Mizoram tlawhtu an pung nasa tih sawiin, Sairang thleng rel a luh hnuah phei chuan Aizawla hotel leh homestay te pawh khualzinin an luah khat thin hle tih a sawi a. "Mizoramin phochhuah tlak hmun mawi leh nuam tak tak kan nei a, heng hmunte hmanga tourist hiplut tur chuan a khawtual mite'n kan hlut a, kan tlawh hmasak a ngai. Hemi kawngah tunhnaiah nasa takin hma kan sawn a, a lawmawm hle a ni." a ti.

Mizoram tourism hmasawnna'na NITI Aayog leh Mizoram sawrkar hmalakna tur sawiho zingah Mizoram Tourism Conclave buatsaih a tel a. Stakeholder tam zawk an tel theihna tur leh, Mizoramin a hlawkpui theih tura ruahmanna siam nise tih a ni. Hemi chungchang bika hmalatu tur 'Task Force' din a, a ranglama a hun tihchian theih nise tiin rel a ni. New Delhi-a 'Mizo Day' hman chungchang sawiho a ni bawk.

NITI Aayog leh Mizoram sawrkar tangkawp chuan November 24 ah Mizoram sawhthing tharchhuah chungchanga inrawnkhawmna, 'Stakeholder Consultation on Ginger Produce for Mizoram' tih chu New Delhi-ah neih a ni dawn a. He hun hi Mizoram Chief Minister Pu Lalduhoma'n a telpui dawn a, sawrkar official bakah industry, zirna in leh organisation tam thei ang sawm an nih tur thu meeting-ah tarlan a ni. Hemi zulzuia sector dang - a bikin tourism - a programme siam chungchang ngaihtuah ho a ni bawk.

Vawiina meeting-ah hian Mizoram sawrkar atangin Pu Vanlaldina Fanai, Commissioner & Secretary, Tourism Department; Pu Alexander V. Chongthu, Resident Commissioner, Mizoram House, New Delhi; Pi R. Lalrodingi, Director, Tourism Department leh Pu H. Lalramenga, PS to Minister te'n Tourism Minister hi an tawiawm a. Vanlaldina Fanaii'n Powerpoint presentation hmangin Mizoram tourism dinhmun tlangpui a tarlang a ni.